徛tī台灣西海岸風頭水尾ê彰化縣線西鄉溝內村，有一項強欲失傳ê無形文化資產－手工製鼓工藝。製鼓匠師黃呈豐是永安製鼓社第2代傳人，也是目前全台灣少數手工製鼓ê老師傅，伊製鼓ê對象有廟宇鐘鼓樓ê皮鼓，廟會接神ê開路、布鐘鼓，陣頭ê文武鼓，閣有戲曲用ê皮鼓kap表演藝術ê太鼓等，製作出來ê各種皮鼓受著相關行業 大量ê使用，家族仔製鼓ê時間對50年代到今已經超過70年。