說明：「乾隆遊山東」一劇全長約為146分鐘，全劇分為八場。此為第四場，約位於乾隆遊山東完整版影片時間線之45:22~57:45。
第四場簡介：陳春貴帶著五色絲綸腰帶來到康三的當鋪，未料康三卻貪得寶貴的絲綸腰帶，與櫃檯瘦圍聯合欺騙春貴，以賤價收購腰帶，並故意將當票寫錯。
對白：
我來 嘿嘿
人啊（人啊）
人無艱苦過
𡳞脬四斤十（你一粒銅的 一粒鐵的）
啥物銅的鐵的（抑無講𡳞脬四斤十）
難得世間財啦（謼 難得世間財 想講你的遐大粒）
你車對遐去
我叫做瘦圍（瘦圍）
我踮咧遮創啥你知毋（創啥）
我專門佇咧顧窗仔口
若講窗仔口
恁逐家攏聽無啦（聽無 毋捌）
就是現代的當店叫做窗仔口就著啦
我專門咧鑑定物件啦
人若提物件來當
看這个有價值 無價值
幾圓拄幾圓
我目睭看 我攏知影
我袂輸璇石目咧
較早按怎樣呢（按怎樣）
較早阮頭的
蹛在山東遮連開十三坎的當舖（喔 連鎖）
我緊咧 我就來予倩
來予倩按怎樣呢（按怎樣）
人講若開張不管啥物物件都愛予當啦
按呢後擺這間店才會興旺
我就聽阮頭的講矣
我來予倩了後
彼陣拄好當咧開張
按怎樣你知毋（按怎樣）
開始放炮
咧放炮進前
有一个衙役
彼已經辭頭路矣（退休矣）
退休了後 伊捎一面枷來講欲當
我一下共看看咧講
哎 誠趣味矣彼
這枷提來當
嘿 我是想講
這个枷若是掠著犯人
無這个枷共枷袂用得呢
頭一个這个枷
我開幾圓予伊 你知毋（幾圓）
開兩兩
袂少矣
開兩兩了後
彼个衙役誠歡喜
錢提咧越咧就行矣
炮仔拄仔放甲中央
彼个時陣才閣一个啥物 你知毋（一个啥物）
閣一个準備麻仔衫佮麻橐包
提這號物件來當
我講 哎喲 這號物件
［亻因〕老爸老母後擺若死
伊嘛愛穿呢
無穿無戴嘛是袂用得
啊 這个凡勢有較貴淡薄仔啦
我拍幾圓予伊呢（幾圓）
拍三兩（三兩）
拍三兩
炮仔拄好霆啊 霆啊 霆甲咧欲無去矣
有一个查某𡢃仔按怎樣 你知毋
攑啥物來當呢 攑屎桶（屎桶會當當錢啊）
會喔 哪袂用得當咧
我想講查某𡢃仔你哪提這號物件來
伊若欲方便
伊嘛會來討呢（著）
這个幾圓呢（幾圓）
這个我拍五兩予伊（屎桶較值錢）
這个閣顛倒較值錢
哇 彼个查某𡢃仔誠歡喜
伊馬是轉去矣
年久月深了後
阮頭的一下查倉庫
哎喲 內面哪有一个枷啊
閣有麻仔衫佮麻橐包
閣有一个屎桶
彼个時陣阮頭的 你知毋
伊就大聲喝落去
這物件啥人予當的
阮遐的兄弟逐家按怎樣 你知毋
逐家攏在座 攏袂曉講嘐潲話
圍仔啦 啥物人
阮頭的共我叫去面頭前 按怎樣 你知毋（按怎）
圍仔圍 你目睭青盲呢
你目睭是去糊著蜊仔肉毋
怎樣這个枷佮麻仔衫佮麻橐包佮屎桶
你予人當按呢
你實在誠可惡啊你
免講嘛無人欲來討
按怎樣 你知毋（按怎）
阮頭的就按呢欲共我辭頭路啦（辭頭路）
辭頭路彼工是當時你知毋
彼工拄好二八（欲過年矣呢）
拄好十二月二八咧欲過年矣
彼年拄好月小
隔轉日拄好二九
二九按怎樣 你知毋
謼 逐家食甲油臊臊
我一下予阮頭家辭頭路轉去到厝的
我就按呢激心啦
就按呢倒踮咧眠床的
加減仔倒踮遐一直想
其實按怎樣啦
我猶有欠人一寡錢
普通討錢攏是二九暗佇咧討
啊我按怎樣呢 我巧
我刁持去寫一對門聯
我共寫按怎樣呢（寫按怎）
寫我佇咧征東征西征無錢
走南走北走過年（走過年）
啊彼條橫展我共寫啥物你知毋（寫啥）
明年新春大發錢
哇 彼若看著的人
逐个都笑
逐家攏毋敢共我討錢
彼个二九暗啊
就自按呢過去矣
到隔轉日拄好正月初一
我按怎樣 你知毋（按怎樣）
普通逐家攏穿甲紅男女綠
這个過年時仔
逐家攏嘛欲穿鬥媠的（穿新衫）
我佮人無仝款
自從阮頭的予我 送我彼个枷佮麻衫佮麻橐包 猶佮彼跤屎桶仔
我透早［足百〕起來 我邊仔弄 弄去佗位你知毋
弄去三叉大路口
最濟人的大路頭
屎桶仔就共囥落去 共當落去 共坐落去
哇 彼看的人 袂講得濟的濟
有的看袂著 閣徛佇街的啦
按怎樣呢（按怎樣）
拄仔好阮員外
伊每年正月初一攏去拜四大明廟
欲去行香
一下看大路口
哇 人頭遐濟啦 到底咧看啥物物件
阮頭的也好好事像
若蹛在山東
佗一个毋捌阮頭的
逐家趕緊閃一逝路予過
我看是阮頭的來
我毋敢見伊的面
頭殼先按呢向向
阮頭的一下來到我的身軀邊
就按呢對我的後尾共恁爸搦起來
伊講 圍的啊你佇當時去犯官司啊
我講 哪有啊
抑無你哪咧攑枷
呵呵 按呢無要緊
伊就講 圍仔 恁老爸老母當時死
我講 無啊
抑無你哪咧穿麻衫佮戴麻橐包
予伊講一下
我目屎規个流對鬢邊出來（無啊 彼毋是目屎 汗喔）
唅啦 彼就是汗 無毋著
伊講 啊 按呢無要緊囉
你當咧落瀉
無啊 我哪有咧落瀉
抑無 你哪咧坐屎桶
去予阮頭的問一下
見笑甲死無人
阮頭的伊才共我道歉
伊講按呢好
我這馬閣共你收留
後擺你目睭著較金咧
該價值的物件 你才共當
抑若無價值的物件 你若看無
講叫我提去予阮老板看
所以講 按呢才閣共我收留
我才會踮咧遮顧窗仔口
按呢好啦 踮咧遮小顧咧 顧咧
我來
當寶 當寶
我掠做啥物人
原來陳春貴你喔
是
欲當啥貨啦
當寶貝啦
抑無這條啥物寶 我看覓咧
按怎樣
一條烏趖趖
準干樂索仔嘛傷過長
啊你毋捌寶啦
這條欲當恁啦
欲幾圓
當一千兩
歁
無啊 你睏猶未精神毋
我是按怎睏無精神
這條帶仔按呢欲價值一千兩
彼無啦 你毋捌寶啦
無你煞袂記得毋
你較早佇大路坐屎桶
閣穿麻衫麻橐包
閣戴枷
好啦 好啦 好啦 好啦
你莫共我搤古早的代誌啦
欲當抑毋當啦
我看無啦 我看無啦
看無你哪無愛提予恁頭家看
好啦 你踮遐小等咧
我提來去予阮頭家看覓就會知影
好 我知
緊去緊出來
好 我提來予看 我提來予看
春貴啊
按怎樣
來 當票佇咧遮
有當票哪會無錢
有影 有影 我來提 我來提
你的頭殼誠鈍喔
怎樣會曉提當票
袂曉提錢出來
頭家無交代
頭家無交代 你實在有夠悾喔
好啦 好啦 悾 好啦 好啦 好啦
陳春貴 遮的錢著提予好喔 緊轉去 緊轉去
按呢我知啦 儑目的就是儑目的 儑目就是儑目
好啦 無要緊
我按怎樣呢（按怎）
我將這條寶帶提去交代阮頭的
阮頭的講按怎樣呢（按怎樣）
這條正正就是五色絲綸帶
皇親國戚才有這款帶
內面有三粒寶珠
一粒價值連城
哇 我聽著按呢生 我規个強欲昏倒
實在有影有價值
阮頭的叫我按怎樣 你知毋（按怎樣）
叫我去拍當票
今年當的 共寫講舊年當的
倒踏年共寫挕捒
一千 我共寫兩千
這箍囡仔歁歁毋知影提轉去矣
嘿嘿 阮頭的 伊講這條寶帶若是得著
伊的確大大欲賞我
今後 擺我富死矣 我富死矣
按呢好囉
窗仔口共顧予好勢 顧咧
