乾隆遊山東-第三段-白玉收春貴為義子典當五色絲綸帶

說明：「乾隆遊山東」一劇全長約為146分鐘，全劇分為八場。此為第三場，約位於乾隆遊山東完整版影片時間線之26:08~45:22。

第三場簡介：賣肉包七歲小童陳春貴恰巧經過，以賣肉包的收入解救了即將被仗打的白玉。白玉聽聞陳春貴的身世後，認為陳春貴就是其夢中的孝子，其母則是節婦，便收陳春貴為義子。陳春貴邀請白玉前往家中，卻已無多餘的錢可以購買食物款待義父。陳春貴與母親商議後，決定將母親的白布裙拿去典當，換取金錢。白玉知道後連忙阻止，把自己的五色絲綸帶拿給陳春貴，讓他去典當銀兩。

對白：

我來　我來　我來
諸位觀眾恁逐家捌我無（毋捌你）
我叫做陳春貴
我今仔日就是奉阮阿母仔的命令
哇　今仔日城隍爺生日
我準備肉包
來到這个所在
欲來賣肉包
今仔日生理誠好
較早攏賣一條街　寢仔肉包攏賣袂完
今仔日踅半街爾
哇　寢仔肉包已經攏賣完囉
聽著人咧講
講山東樓　有人掠人來到這个所在講欲拍來錢
到底毋知啥物款　我來去共看覓咧　我來共看覓咧
嘿　我掠做啥物人咧
原來就是頭大的
恁母較好　大頭的你毋共你爸叫　叫你爸頭大的
攏仝款啦　大頭頭大攏仝款啦
呼　仝款你就仝款
抑無你咧創啥
我奉阮老板的命令
將這个少年家　共捎來拍來錢
嘿　毋知會用得借我看一下袂
好啊　欲看做你看啊
好　我來看覓
喂　頭大的
按怎樣
這个看起來真忠厚啦
若按呢生
拍來錢　是拍啥物意思毋
我毋著都奉阮老板的命令共捎來拍
拍看錢　走會出來袂
莫啦　莫啦　莫按呢生啦
好啦　好啦　你也看我的面啦
你放伊轉去就好
人欲提錢來予你
按呢就好勢矣啦
無啊　你咧講啥
喂　啊你籃仔
籃仔我賣肉包的錢啊
通共幾圓
喂　我算起來差不多一百五十錢的款
我看覓　我看覓
呼　按呢好　按呢好
遮一百五十錢
是啊
抑無　按呢啦
陳春貴　你這一百五十錢我共你提來
毋過猶欠三圓我這跤籃仔共你捾轉來
你三圓若是提來　我這跤籃仔才還你
這个人我放予你
我將你的籃仔提轉來
大頭的啊　你誠害啊你
你規跤籃仔共你爸捾去
我誠實是這馬無錢
是講按呢嘛無要緊
阮媽媽定定共我教
教講救人一命值千金
今仔日誠拄好　拄好來到遮
來排解這个少年家
按呢縛牢咧嘛誠歹看
我來去共敨索仔
真感謝小哥你來解圍
人客倌　咱莫踮遮
三叉路口遮人誠濟
咱來去巷仔遐
咱來去巷仔才來講
是　是　是　頭前帶路
對遮來　對遮來

喂　來到遮無人
照我看起來
人客倌　你毋是阮山東人乎
不是
毋是　咱來借問咧人客你蹛佇佗位
我蹛在北京
啊毋著北京人客囉
是啊
毋知高姓大名
我叫做白玉
謼　你就是叫做白玉人客喔
不錯
你來到阮山東
來遮販賣真珠
順紲各處觀一下景色
按呢　誠好　誠好

真感謝　真感謝你這位小哥
毋知你姓何名誰
白玉人客
我姓陳　名叫做春貴
你的家下
阮兜喔
是
阮兜真拄好啦
阮老爸早已經破病無佇咧囉
干焦單賰阮母親在堂
喂　人客倌　有影啦
你來到山東　毋知歇佇咧啥物所在
踮在張三店

唅　歇佇咧張三的店裡喔
不錯啊
啊彼誠拄好
張三正正就是阮舅仔
你的母舅
唅　是咧　是咧　是咧
哇　彼誠拄好呢
按呢咱拄好踮咧遮咧相見
mngh　mngh　好也
我在佇京城龍床安睡
夢見山東出有孝子節婦義士
孝子就是這个
更妙　待我向前相見
哎呀　春貴
喔　北京人客
我看你真乖巧
也來排解著我無代誌
我一言相告　毋知貴意如何
北京人客　你咧講啥　我哪會聽無唅
喔　我想欲來佮你參詳
欲佮我參詳啥物
參詳你予我做義子
唅　你欲收我做契囝喔
不錯
我想看覓咧
小等咧　我想看覓咧
按呢欲哪會用得
伊欲收我做義子
啊阮老母仔毋著愛予伊做某
按呢我算得袂行得喔
北京人客　我予你做囝是會用的
抑阮老母是袂用得予你做某呢
我不過是收你做義子而已啊
佮你的母親全然無瓜葛
若按呢　真好啊　真好啊
北京人客在上
原來就是義父
我一个義子　義父　義子
受我跪拜

若佮義父今仔日會得見面
實在真有緣份
總是義子
我這个時陣𤆬你來去阮兜
來去熟似一下
後擺你若來　你毋才知位
不錯　義子頭前帶路
對遮來　對遮來
將阮義父案內佇咧廳的
一下想起來
義父來甲阮兜
阮嘛愛加減仔攢淡薄仔來請伊毋才著
喂　害矣　
我身軀的閣無半仙
啊　好囉　不如來去後堂會見母親
共提看幾圓仔銀兩
順紲來去買一寡菜味
來款待阮義父　按呢毋才有禮數
按呢好　我來去見阮母仔　來去見阮母仔
來了　我囝一去心不安
未知何時回家山
廉妾　張氏

當時我君翁母結髮
單生我兒叫做陳春貴
薄命君家致病早年亡故
無惜著阮的苦心
來養成我兒
今年已經七歲囉
我做肉包予伊往到街衢去販賣
母囝是罔度光陰
為何落街販賣肉包
為何迄今未回
我來　我來
母親叩參
囝兒你轉來囉
是啊
販賣肉包事因如何咧
母仔　今仔日誠好生理
不但肉包賣甲完
連彼跤籃仔我嘛煞賣去囉
唉　你為何參為娘咧說笑話
有影都著啦
母仔　我有一層代誌欲來向母親你稟明
啥物事
喂　我賣肉包完畢好勢
一下欲倒轉來　在著彼个三關大路口
真拄好　拄好山東樓彼箍大頭的
掠一个人欲來拍來錢
經過代誌母親你聽囝稟明
若是如此
囝兒你真乖巧
你有聽見為娘的訓示
救人一命值千金
這是不錯
現時北京人客咧
我都共案內佇咧咱廳堂的　伊落相落相踮遐坐
我想講來到後堂
共母仔提淡薄仔錢
來去監辦一寡物件通好來孝敬義父
唉　囝仔　你全然不知
為娘做肉包予囝落街去販賣
今所有的肉包錢你盡為北京人客清納完畢
為娘家下分文俱無囉
唅　無半仙喔
是啊
若無半仙　不如按呢啦
母親啊　你想看覓咧啦
看有啥物件　我提來去街的來去當
咱來去監辦一寡物件來孝敬義父
彼个時陣最後喔

我才較骨力趁咧啦
咱錢若是趁有夠額
彼物件咱才共討轉來
唉　若甲是這層事
囝你暫等一晡
待為娘內中取一个物
這塊正正就是為娘的白布裙
你將這白布裙往到街衢去典當
我知啦　我知啦
母仔　你莫煩惱啦
我將白布裙提咧
我來去街去典當
母親　我來去　我連鞭倒轉來
囝兒實在真乖巧
若甲是這層事
不如待過老拙
在內期待我兒消息啊
嘿嘿
我來
義子
唅
你坐下啥物物件
無啊　哪有啊
我雙手空空　無啊
你坐的所在
今　彼好矣彼

你誠害啦你
叫你覕　你毋覕較牢咧你
害我去予阮義爹看著矣
喂　義父　囝是毋敢相瞞啦
義父　我請你來到阮兜
怎樣予你落相落相踮遐坐
我想講欲共阮母仔提寡有加減仔錢無
來去辦一下物件通好來請義父你
阮母仔講無錢
就準備這个白布裙
叫我落街去典當欲來請義父你
喂　哎呀　義子春貴
唅
你將這白布裙帶回內中交還你的母親
為父我來準備一項物件予你落街典當就是嘛
嘿　按呢我知　我知
我白布裙提來去還阮母仔
義父啊　抑無你
來　義子　我將這條交代你
啥物物件我看覓咧
喔　啊這條帶哪會遮爾長
若準干樂索仔嘛傷過長
若欲做褲帶　上少拋咧幾若輾
哎呀　義子　這條叫做五色絲綸帶
喔　五色絲綸帶喔
是　為父欲叫你落街典當　我先問你
義父　你欲問我啥物
咱這个山東佗一个當舖最第一大間
當舖喔
是
抑若當店乎

有一个叫做康三啦
這个康三員外
哇　在山東　連開十三坎當店
按呢緊也
命你將這條帶提去康三店門去典當
嘿　義父啊
啊這條帶毋知欲當偌圓乎
一千兩
唅　欲當一千兩啊
不錯
哎喲　一條烏趖趖
義父　敢有可能
囝你毋捌寶貝
你帶到當店
你就真知影
按呢好　按呢我知　我知
義父你蹛遮小等我
我提物件來去典當
我連鞭轉來　我連鞭轉來
我囝準備寶帶
往到街衢典當
待我在家伺候了