乾隆遊山東-第二段-白玉山東樓遇難值日公曹救駕

說明：「乾隆遊山東」一劇全長約為146分鐘，全劇分為八場。此為第二場，約位於乾隆遊山東完整版影片時間線之11:39～26:08。

第二場簡介：白玉自城隍廟祭典離開後前往山東樓用餐，卻在結帳時發現錢包遭竊。白玉欲先賒帳，返回客棧取錢，夥計大頭仔不同意，認為白玉要仗著張三的名義佔便宜，帶著白玉去見老闆江阿霸，一向不許人賒帳的江阿霸下令當街仗打白玉，值日公曹救駕白玉。

對白：

觀看梨園已經倒也完畢矣
腹中飢餓
看見前面我來去揣看有啥物食晝的物件
待我向前查看便了
我來
酒啊酒
酒是摻紅麴
食著喙落落
有的倒東西啊　有的倒南北
醉罔醉
毋捌翱落礐啊翱落礐
喂　二六　十一（十一）
三六　十七（十七）
抑若年頭吭吭算（按怎）
年底我攏袂得通好直（較加你嘛袂直）
我按怎樣
（你都顧一想七啊）

（二六　十二呢三六　十八）

（你顧一想七　免講你終身袂得通好直）
乎二六　喔（十二）
我就是顧一想七啦
三六　十八都著毋（著）
按呢　按呢　我家己算錯矣
所以講年頭吭吭算年尾攏袂得通好直（著）
諸位觀眾　恁逐家捌我無（毋捌）
我叫做大頭仔高嬰
我蹛在這山東
踮咧阮頭家這間店內
我目睭前　我攏佇咧掌管咧就著啦
開這間山東樓童叟無欺
大人囡仔來交陪攏總仝款
哇　日頭已經晝矣
今仔日誠拄好
城隍爺拄好佇咧做生日
往去人客真濟
日頭晝囉
夥計內面椅仔桌仔著去共我拭（拭）
滷蹄著共我滷落去
我踮遮侍候人客
走店主
我掠做啥物人
原來就是人客倌
是咱內面可有酒菜
若講甲阮這間酒菜讚閣大盤
予你食落到地　攏會合你的喙
你若欲挃上的　中的　下的
阮遮攏有分
準備上酒上菜
哇　欲挃上酒上菜喔
是　
按呢好
請人客倌入去內面
酒麵菜隨後就到矣
請了
行予好
夥計　好矣啦　好矣啦
人客都入來矣　你閣按呢
共我拂鬥長的
按呢袂用得啦
趕緊啦（好）
上酒上菜共我攢落去
我捀來去予人客用（行　行　行）
酒攢落去喔
酒宴既便　待我獨坐自飲
店主來
我來
人客倌猶有啥物貴事
阮的菜味好抑䆀
真好
通共偌圓
通共幾圓喔
是
你那佇咧食

阮那佇咧算啦
通通共共拄好一百五十三錢
一百五十三
著
等待我取之
你做你提
啊
無啊　人客倌是按怎樣
我的皮包無去囉
唅　你的皮包無去矣
是
呼　按呢看欲按怎樣
一百五十三錢咧呢
店主請你安心
你予我小限咧
我來到山東就是歇在張三的客店
一旦我的錢若甲失落去
不如你予我寬限
我先轉來去張三店主彼个所在
我準備一百五十三錢　我才提來還你
我敗囉　兄弟（按怎）
按怎樣啦（按怎）
這个看伊穿長衫閣穿甲誠飄撇
這个古意惡　刁意故的啦
按怎樣（按怎）
先知影阮頭的喔
伊就是想欲欺刻(與師父確認)這个張三

伊刁持欲來看張三的勢力
來到咱店裡欲來共咱食物件食無錢的
講伊轉去欲提錢啦

按呢好　按呢好
喂
店主抑無按怎樣　是毋
你毋通按呢生喔
我看你是忠厚忠厚　古意古意喔
按呢　若無錢
行　佮我鬥陣來去見阮老板
毋通啦　小可仔代誌
你予我小寬限咧
無啦
行　佮我來去見阮老板　行
閒下無事誌
坐在店中解心意
諸位觀眾在座你大家相捌（毋捌你啦）
我姓江（江）　一字名叫做霸（江霸）
外號人稱　出林虎（誠歹的款喔）
我蹛佇山東
開這間山東酒樓
我這間店
童叟無欺
大人囡仔來交關攏總仝款（仝款貴）
按怎　我是佮恁按怎樣（按怎樣）
彼號歹錢我攏無愛挃（假錢）
也袂用得賒數的
若是講欲共我賒數
閣一搭久仔　伊連鞭流鼻血啦
拳頭拇是誠濟啦
拍甲予伊攏連行路　伊都袂行路
夥計　將店共我顧予好勢（好）
今仔日生理當好
行　來去　行
原來就是老板
老板喔　落板著去棺柴店
喔　啥物棺柴店
抑無你講落板
我是稱呼你頭家
喔　頭家就頭家
抑有這　老板的
大頭高嬰
按怎樣
抑無你捎這少年家仔來創啥
是按呢啦
伊都共咱食一頓晝頓
一百五十三錢
講伊錢拍無見啦
其實伊明明是故意
講叫咱予欠啦
伊欲轉去張三店的
講錢才欲提來還咱啦
唅　掠張三店主欲來共我恐喝喔
喔　按呢　按呢　誠好
你實在有影誠儑目啊你
你攏無共我探聽看覓咧喔

住在山東開這間山東樓
佗一个敢掠我
獨獨干焦你一个爾爾
來唷趕緊
將這个捎去
欲捎去佗位
捎去十字路口共拍
共我拍來錢
頭家
若毋拄好共拍死欲按怎樣
拍死人命本老板擔當
好　按呢我知
兄弟　共押來去十字路口　押來去　行
毋通啦　毋通
我若無按呢　山東猶有啥物人會驚我
愛共下打一个馬威咧
夥計　暫時照顧山東樓啊
勿看虛空無報應
舉頭三尺有神明
值日公曹
受玉帝旨意
綴乾隆帝主下遊山東
叫我著保護伊乾隆帝主
現此時我已經前去參拜城隍境主完畢
聞知萬歲現此時有難
待我準備來去君前保護伊萬歲
行行行行行
共縛牢咧矣
棍仔共我攑來（阮來攑）
這支棍仔共攑咧

捎起來會挵得　我盡量共你挵落
按呢好
喂　恁逐家啊（好）
這个少年家啥物人你知毋（啥物人）
出外人（出外人）
到阮山東樓
去共阮食一頓晝飯
講啥物伊無錢啦
伊這明明　就是欲靠張仔三的勢力
欲來壓阮老板
阮老板氣著講叫我愛捎來十字路口人真濟的所在　

來共拍來錢
若拍死
阮老板伊欲來擔當
按呢好
我欲相精精　若無對這个腹蓋共siò落袂用的
哇　夭壽（是按怎）
你爸大力共siò落去
這支棍仔哪共我噴倒轉來
哇　對我大頭按呢撼落去
啊　好啊
我都毋相信
我這支捎起來
這馬用怙沖的這馬用怙沖的較成力
喂　喂　喂
哎唷哇　夭壽（大頭的你流鼻血矣）
哎唷　真正流鼻血都著
哪會按呢生
你爸拍伊無甲半下著
我家己按呢
拂甲歪膏揤斜
哎唷　哪疼甲遮死人款

基本資訊

原始資料連結原始資料連結

資料來源機關收存系統

主題分類藝術與人文

建檔單位後場音像紀錄工作室有限公司

創作者

陳錫煌傳統掌中劇團

時間資訊

演出時間

2019/08/29

媒體類型

影片