說明：「乾隆遊山東」一劇全長約為146分鐘，全劇分為八場。此為第一場，約位於乾隆遊山東完整版影片時間線之00:00～11:39。

第一場簡介：清代乾隆皇帝夢見山東出孝子、節婦、義士，便化名白玉，與化名王勇的御前監軍甘國寶假扮為叔姪，一同到山東出遊，投宿於前魔盤山賊王張三所開的客棧。某天，白玉獨自前往城隍廟祭典，卻在途中遇到小賊吳鐵牛，錢包遭竊。

對白：

有心耕伊尹 渭川朝子牙
一日離京百日深
相似孤雁宿山林
雖然出外風景好
思念京都一片心
小人　白玉
我非是白玉
正是大清帝主
我叫做乾隆
但是我在京龍床安睡
夢見山東出孝子節婦義士
致使寡人將大清大業目睭前交代劉陽卿攝政
我與東衛甘國寶
假做叔姪的打扮
來到山東　歇在山東客店
但是寡人來到此處
猶未曾出去街衢玩遊
我就此請伊來
內請張三店主相見
原來就是白玉人客
正是張三店主請坐
同坐　同坐
但不知白玉人客
到底是啥物貴事
是按呢
自從阮叔姪來到山東投歇佇你的店內
是啊　白外有啥物交代無
店主我來借問你
最近咱山東佗位是第一熱鬧的所在？
乎　最鬧熱的喔
是啊
若講最鬧熱的　按呢啦
誠拄好白玉人客你來到阮山東
今仔日最蓋好天
閣有城隍爺壽旦期日
城隍廟口遐咧搬正音
哇彼人是人山人海
彼个所在最第一鬧熱
 是　是者

若是如此
 我就要準備告別店主你
 往到伊城隍廟來查看這个梨園
 按呢好
 但是白玉人客
 你來到阮山東
 總是你著愛加添留神仔細　
 著愛保重你的身體
 真感謝店主
 賢姪　雖是在這个店內
 伊若問講我去佗位
 你共提說我落街玩遊　不久就回

我知　我知　我知
 人客倌　受我奉送幾步
 不用　該然啊
 白玉人客出外去𨑨迌
 夥計趕緊照顧這个店內
 白玉人客若轉來才報本老板知情啊
 痟的啊（痟的）
 痟的　痟痟痟
 痟的做人無妨時
 老爸老母來死無干己
 窮的窮寸鐵
 富的富拄天
 欲好額著等後世啊等後世
 甌四著煎七分啦
 無啉連鞭見閻君
 啥物甌四

我是講後世毋是講甌四啦
 後世人就著啦
 你著共我聽予好勢
 齁　後世人重出世
 這世人實在有影攏誠歹講就著啦
 這也是人生的運命啦
 諸位觀眾恁逐家在座相捌（毋捌你啦）
 我面仔烏烏
 蹛佇這个山東　人人叫我叫做烏面的啦（烏面的）
 著啦　烏面賊仔就是我啦
 我這个賊是按怎予人叫慣勢你知毋
 啊　我就是專門咧做彼號無本錢的生理啦
 啥物　你咧講啥
 無本錢的生理　講著無本錢的
 恁逐家欲來佮我學毋
 毋是啦
 無本錢　我咧做啥　我咧做賊
 做賊乎　逐家講毋值啦
 抑若我做賊　小可仔賊爾　我毋是大賊啦
 按怎樣呢　我專門咧做剪綹仔
 加減仔剪淡薄仔乎
 抑我若有所費
 我就無閣出去賺食就著啦

謼　這幾工西北雨落上大
 攏袂得通好出門
 今仔日按怎樣　你知毋
 咱城隍爺拄好佇咧做生日
 哇　彼个廟口乎
 外位仔人誠濟　人山人海
 不但講人山人海啊
 這个城隍爺廟的門跤口閣佇咧搬正音
 乎啊　彼人猶閣較濟
 按呢好　真久無趁矣
 加減仔來去賺食看有淡薄仔所費無
 行　來去　行　行　行

啊唷　哪按呢生啊
 行來到遮　人雖是濟來講

前面閣一箍少年家仔
 看咧宋盼宋盼
 這个敢毋是阮山東的人呢
 一定是出外人
 穿得閣誠飄撇
 按呢好啦　加減仔趖倚來

來去賺食　來去共賺食淡薄仔
 啊　啊　啊　失禮　失禮　失禮
 這个人客倌皮包仔予我賺落矣
 伊猶閣攏毋知影
 嘿嘿 落相落相行去囉
 哇　這个皮包仔哪會遮媠啊
 一爿閣繡龍　一爿閣繡鳳
 到底內面囥啥物物件佇咧
 我拍開共看覓
 喔 喔喔喔啊
 全瓜子糕啊
 抑無　你講啥（講全瓜子）　
 毋是啊　全瓜子糕啦　啥物瓜子
 無啊　瓜子糕你毋捌看過毋（毋捌喔）
 內面摻瓜子啦
 落去搙搙搙彼號粉
 搙搙咧就號做瓜子糕啦
 毋是瓜子糕　是瓜子金啦
 謼　這瓜子金閣袋甲飽飽飽
 按呢誠好　這港把上少食咧到冬尾
 按呢好　按呢好
 提咧　順紲來去筊間的
 加減仔閣來去奕　看這錢有通閣贏淡薄仔無
 行來去來來來