說明：「彭公案之唐家嶺」一劇全長約為109分鐘，全劇分為八場。此為第五場，約位於彭公案之唐家嶺完整版影片時間線之48:06～01:08:17。
第五場簡介：在晏煙的半哄半騙之下，哈嘻相信了晏煙以後會賦予他權力，便認晏煙為「師兄」，還用身上的鑰匙開了收藏寶物的寶房，向晏煙展示了九龍神火鞭以及雙稜峨嵋刺。
後來，晏煙謊稱自己有「著猴損症」，需要喝黑狗血才回痊癒。哈嘻信以為真，因此偷偷殺生取黑狗血以救師兄。晏煙又讓哈嘻拿來非非和尚的菜酒，並灌醉哈嘻，偷取他身上的寶房鑰匙，用黑狗血成功破了九龍神火鞭，並取了峨嵋刺，準備遵照老禪師的指示，前往千佛山真武頂。
對白：
嘿嘿 來了
了盡的 你實在有影
你佮咱師父乎
實在有影有彼个緣份啦
你按呢誓一个咒落去乎
咱師父自按呢信用你
欲共你收留矣
嘿嘿是啊
最後咱就是師兄弟
無毋著啦 按呢塗跤底坐
我拌拌咧
無你咧創啥你
塗跤有塗粉仔佇咧啊
我小可共拌拌咧 共歕歕咧
坐塗跤毋才袂垃圾
按呢坐坐坐
後擺咱師兄弟矣啦
你愛著叫我師兄喔
無囉啥物我叫你師兄
我叫你師弟
哎喲
人咧講 先得先是後得後
是啦 這句話我嘛知影啦
抑無是按怎你欲叫我師弟
這个是按呢 我問你
你捌字抑毋捌字
字喔
是啊
若字這个是按呢生啦
我捌伊 伊毋捌我
嘻嘻嘻 按呢你就是毋捌字嘛
是啊是啊我毋捌字啦
我今仔日坦白講的啦
但是 師弟
唅
咱師父蹛在著這个峨嵋山峨嵋禪院
是不止仔予人共伊恭敬的啦
伊也誠出名
是啊 無毋著啊
你毋才欲來拜伊做師父啊
抑毋拄好 若是一寡施主倌
來遮欲來還願
抑是欲來寄付著這个錢
攏嘛愛寫數啊
著啊
彼个數 你會曉寫袂
我袂曉呢
你若甲袂曉 無按呢啦
咱師父後擺伊的確會重我啦
重你欲創啥
我寫數啊
人若是用怙錢欲來共咱寄付
彼个時陣我嘛會曉共寫單予人
啊你通通攏袂曉的咧
咱師父老矣呢
是啊 師父真老矣無毋著
咱師父毋拄好若曲去乎
按怎樣
伊這个大權的確會放予我咧
無毋著啊 會放予你袂放予我
你都毋捌字你欲按怎做主持
啊 有影乎
嘿嘿 知影 師弟
按呢叫落去到地
順喙順喙啦
無毋著
按呢
抑無是按怎樣啦
我聽你佇咧講乎
咱師父講有寶貝佇咧啦
有囉 咱師父寶貝偌勥咧
勥甲按怎樣
彼个寶房內乎
內面彼个物件誠濟
謼你看落到地你的確會去煞著
啥物物件啦
按呢啦 我若用怙講的按呢費氣啦
無不如規氣啦
我𤆬你來去寶房
來去現場予看你才會知啦
欲來現場看喔
是啊
啊有鎖牢咧無
當然是有啊
啊鎖匙咧
鎖匙攏佇咧我的身軀的
無要緊啦 無要緊啦
我來開予你看
敢通
沒有關係 無要緊
後擺你欲做我的師兄
全大權你攏愛放予我
你做你免向
哼 無你哪會叫我免向
毋是啦 免畏啦
喔 免畏 毋是免向喔
是啦
行行行 來來來
我𤆬你來去 對遮來
佇咧遮啦
寶房鎖牢咧 我㩮鎖匙
開落
無啊 今是開會開抑開袂開啊
毋是啦 這个寶房乎
鎖匙久無開著 所以講較澀
咯呸
無啊你哪會呸喙瀾
呸喙瀾落去較澹啦
開乎較好開啦
tshi-bú-tsi-tsiutshi-bú-tsi-tsiu
tshi-bú-tshi-tshiu
無啊 看你哪會tsiu-tsiu叫
啊就呸喙瀾落去 澹啦
澹開落去到地
毋才會tsiu-tsiu叫
諾諾按呢喔 開矣未
開矣開矣開矣
開開 對遮入來對遮入來
喔這間寶房閣不止仔闊喔
是啊 當然這个所在真闊無毋著啊
寶貝佇咧佗位唅
提出來我看
哎喲
喔 這支刺夯夯
另外一支閣烏銑烏銑
無啊 這支啥貨 這支啥物
喔 這支喔這支號做雙稜峨嵋刺
啥物款的厲害啊
若講甲這支峨嵋刺的厲害乎
你不管啥物碗糕甲攏好啦
寶刀寶劍你若刣袂落去乎
予這支峨嵋刺若動落到地乎
神做貴物的厲害
插著到地乎 皮裂骨紲折
遮厲害啊
是啊
喔 啊過去彼支咧
彼支號做九龍神火鞭
咱師父若是佮敵人佇咧削
伊若千軍萬馬
予咱師父伊若是將著這支九龍神火鞭
擲到半空中
唸動幾句真言咒語
變成九尾火龍
閣咒閣催落去
龍就吐出烈火
你若千軍萬馬一定予火活活燒死
喔哇 遐爾厲害啊
就是講按呢生毋
按呢好 按呢好
咱師父實在有夠勥
有這款寶貝 按呢好按呢好
今看好勢矣
莫閣看矣 出來出來
欲出來矣喔
好好好 出來出來
塗跤底坐
師兄 我今仔日
看對你有盡心抑無盡心
你講欲看寶貝 我就𤆬你去看
抑若別人彼是無矣囉
咱師父交代這个重要的寶房一定
袂用得予人入去的啊
我今仔日𤆬你入去乎
師兄你的確
你最後你愛著將這个大權
你著放予我喔
師兄 你哪會攏恬恬咧創啥你啊
師兄 你哪會攏無回應
師兄
哎喲 哪會按呢掣一下掣一下
師兄 你喙齒瀾流出來矣呢
啊毋著欶入去 講按呢啦
哪會按呢掣一下掣一下
師兄 抑無你是按怎
你莫予我驚著喔你啊 師兄
哎喲 哎喲
我會死 我會死
師兄 看應該是按怎樣啦
你若甲有病應該就有藥救
哎喲 師兄 你這款症頭
我都毋捌看著 哪會按呢生啦
哪會攏無愛講話
目睭規个齊吊起來啦
哎喲 哎喲
按怎樣 莫定定咧哀啦
看應該按怎樣毋著較緊來解決
這 這我來遮
我是無法度通好救矣
抑無是按怎無法度通好救
踮咧阮兜是真簡單
來遮乎 逐家攏是出家人
就袂用得殺生的啦
哎喲 抑無是欲殺啥物生
你毋著講
總是師兄乎 最後你這个大權
你若甲欲放我乎
不管按怎樣 我的確伨你啦
有影無
當然是有啊
好啦 我共你講
我這款症就是叫做著猴損症
唅 著猴損啊
是啊
著猴損就是按呢生喔
無毋著
著愛啉烏狗血我才會好
阿彌陀佛 阿彌陀佛
袂用得殺生的啦
這个烏狗血是精牲啦
袂用得刣精牲的喔
阮出家人一定愛著唸阿彌陀佛
絕對袂用得殺生
哎喲
好師兄 師兄
無要緊 無要緊
今仔日若甲為著你乎
我若殺生也無要緊
總是師兄你較忍耐咧
哎喲 我一定會曲去
袂啦
袂曲 袂曲 安心
你做你遐小等我
咱彼个山跤乎
大田寮遐有飼四五隻烏狗佇咧
我我我刀攑一支
來去刣烏狗 承烏狗血來予你啉
看你這个著猴損症看會好抑袂好
哎喲 真多謝 你著較注意咧
安心 小等咧小等咧
我來去刣烏狗我來去刣烏狗
嘿嘿 這箍戇和尚
今欲去刣烏狗
喂 哎喲到庄的矣
三 四隻烏狗佇遐咧共逐
喔 掠著矣 掠著矣
哎喲
哇 閣誠實有影承來矣
按呢好按呢好捎來捎來
好 行
師兄
無人看著 無人看著
趁燒趁燒 趁燒你緊啉喔
我啉我啉
捀予好啦捀予好啦
莫捙倒捙倒拍損
哎喲 師兄你哪會無愛啉落去啦
嗯 誠趣味矣嘿
我若踮阮彼个故鄉乎
我就用怙啉的
今仔日烏狗血捀來我鼻咧到地
欸 感覺我這著猴損症就按呢好矣啦
謼按呢鼻的就好矣
是啊
按呢好
我將遮的共捀
莫莫莫 你莫共我捀去
捀來做挕捒啦
無毋拄好去予師父若是看著乎
一定食罪難當啦
安啦 安啦 我共你講
這个烏狗血乎 我提來去藏
毋拄好著猴損症若是閣起起來乎
著閣去殺生按呢麻煩毋好
抑無欲按怎樣
我提來去藏予好
你莫看伊 你若莫看
我來藏予好乎
師父𪜶逐家通通攏毋知
好啦 按呢我知我攏莫看
我莫看 看欲提去藏 你提去藏
袂用得看喔
是啦 我莫看
好 我提來去藏
我藏好勢矣
藏好勢矣乎
著
後擺大權乎 你袂使予別人的喔
你愛著予我哈嘻的喔
是 我知
欸
無啊 你的代誌哪會遮濟啦
抑無這馬這啥物症唅
我就鼻著
我知我知
你的確鼻著烏狗血
欲吐仔欲吐 欲腹反就著啦
好好好 你莫講話 你莫講話
這馬這就愛用啥物共你治
才有可能會好唅
這个就燒
喔 你講燒 我就知影
燒酒毋
喔 那卡西按呢好 安心
咱師父乎伊家己有激彼號菜酒
謼 彼个菜酒偌好啉咧
啉落去到地誠滑喉
有 有影
你莫講話 你莫講話
我來去提 我來去捀
佇遮 倒落無要緊
tshāi予好
莫啦我提 我提
我啉看覓
哎 確實有讚
咱師父這个菜酒乎
實在有影有夠澈
喂 師弟
師兄 按怎樣
我看你有兩个酒窟仔佇咧
燒酒你無一定的確會啉的款喔
普通啦 雖講會啉乎
阮遮的下跤手人攏嘛無法度通好啉
彼攏嘛師的佇咧啉較濟
今仔日你若甲捎一壺來乎
你若甲會啉無要緊
我敬你 我敬你
小可鬥相共咧
乎 提來
我我我共你敬
莫啦 毋通啦 我就無正港會啉
袂啉無要緊啦 啉淡薄仔 啉看覓
哎喲 師兄 莫啦
莫莫莫𠯗一下就好
我就共你講我就無啥甲偌會啉
你一定欲予我啉
啉落去到地 我
無要緊 無要緊 閣灌
盡量 盡量 盡量啉予爽快啦
師弟 師弟
就按呢醉落去矣
醉上蓋好
恁爸共捎來去邊仔藏咧
無人看的所在
恁爸共你捎來 共你𤆬來藏
𤆬去無人看的所在共藏牢咧矣
彼个褲頭龍仔鎖匙恁爸共提來
來去開寶房 來去開寶房
開落
好
雙稜峨嵋刺
按呢先共你賺食起來才來講
袋落去
這支就是叫做九龍神火鞭
抑若論起著非非和尚呢
伊是專門咧助這个反賊
最後就是欲來佮大清做對
這支九龍神火鞭若無共破擲捒
後擺是我清兵一定不利
按呢好啦
我來去準備烏狗血
順紲破你的九龍神火鞭
將烏狗血潑在九龍神火鞭
化
照著慈照老禪師的交代
偷伊的峨嵋刺
順紲破伊的九龍神火鞭完畢
今到這个時陣乎 了去上盡矣
峨嵋刺也無去
九龍神火鞭也報銷去矣
按呢了去做一下盡
按呢奉著老禪師的交代
再進到千佛山真武頂
