說明：「年羹堯」一劇全長約為76分鐘，全劇分為十場。此為第五場，約位於年羹堯完整版影片時間線之16:20～39:00。
第五場簡介：
郡主自宮中返回年府，年祿誣陷春花色誘老爺（年遐齡），並將春花懷孕一事告訴郡主。郡主聽信年祿讒言，認為自己可能因此失寵，便叫年祿杖打春花，春花遭到杖刑後早產，兒子（年小兒）額頭中央有一粒紅痣。年祿及郡主協議後，決定將胎兒拿去餵豬以絕後患，並且囚禁春花。忠心的年福偷偷將年小兒從豬圈救出，並自行帶回家撫養。
同時，年祿提議以自己剛出生的小孩（年寶寶）冒充，讓郡主假裝懷孕以博老爺歡欣。實際上，年祿是想藉著讓渡自己的小孩來得到年家的財產。
老爺回來後，才正想問春花小孩的去向，就接到內監傳來的口詔，只好先請年福備香案接詔。
對白：
唉 目當今這个好人實在袂做得
按怎阮郡主轉去宮中
遮爾久猶未倒轉來
報
啥物代誌啊
郡主回年府囉
啥物 郡主倒轉來矣
哈哈哈 趕緊迎接
哎喲 迎接囉
哇 郡主啊郡主 你倒轉來矣呢
到底王后的病體可有健安
託天庇佑 母后病體安康
欸
按怎
年祿
喂
為啥物無看著老爺呢
喔 老爺
老爺奉旨到南邦封王無佇咧
喔 未知家中有大小事情嗎
嗯 唉
欸 年祿為啥物你會哀聲嘆氣呢
郡主啊 今這个話我毋敢講啦
萬不二老爺若轉來乎
我 食罪難當
哎呀 有本郡主在 你驚啥物
一切由我負責 緊講
郡主啊 是按呢啦
自從你離開年府了後
彼个春花乎
伊就展著妖嬌的體態
來迷惑咱老爺
現在乎
春花已經有咱老爺的骨肉矣啦
唅 是誠實的 哎喲 謝天謝地
唅 郡主啊今伊有身 你咧謝啥物天地諾
因為年家後嗣有望
當然謝天謝地啊
嘿啦 話是按呢講無毋著啦
猶毋過春花若是生查埔的
老爺一定會對春花較好淡薄
對你會真冷淡喔
嘿 我是驚你的地位
會按呢漸漸仔無去喔
敢誠實有影是按呢
當然是有啦 我才毋敢講啊
你做你講
抑無我去叫春花出來 好無
好 共我叫出來
好 嘿嘿嘿 鳥鼠仔冤有通報矣
春花 春花你共我出來
來囉 來囉
啊 年祿哥 啥物代誌是毋
郡主咧叫你啦
唅
喔 來來來 你欲佗 你欲佗 唅
郡主倒轉來佇咧叫你
你越一下身做你行唅
年祿哥 是按呢啦
我想講來去換一軀仔衫
衣冠整齊才來見郡主啊
免 毋免遮厚禮數 行
行行行 跪咧
哎喲 郡主萬福啊
徛較騰咧
你咧看啥
春花你 你真是大膽
可恨春花你太不該
敢與老爺來結珠胎
看我不在你的眼內
你癡心妄想想欲奪錢財
我佮老爺有意愛
非是佔業欲霸財
花言巧語來辯解
最後必將郡主害
年祿 年祿家法共我攑出來
我來去攑
郡主 郡主你饒命 郡主
來 將春花打
我共你拍 欸 等咧等咧
啊郡主啊 這號代誌我是毋敢喔
萬一老爺若是轉來共春花問
春花若是一爿目屎閣一爿哀
我的尻川就受災
死奴才 本郡主在你佇咧驚啥物
叫你打 你就打
哈哈哈 春花啊春花
會記得無 二十下尻川
我講愛 你就無愛
老爺愛 你就愛
春花 是郡主叫我拍的
皮共我繃較絚咧 拍
哎喲哎喲 我的腹肚
我的腹肚足疼的
年祿啊 是發生啥物代誌啊
啊都袂堪得重刑
伊的腹肚內彼囡仔乎
誠拄好就按呢共生出來矣
唅 囡仔生出來矣
是啊
這這這 這欲按怎
緊 去抱來我看覓咧
好好好 我趕緊來共抱出來
郡主請看
來 我來看覓咧
哎喲 這个嬰仔生做眉清眼秀
佮老爺年少的時陣是一模一樣啊
郡主啊 雖然人咧講乎
細姨生囝是大某的
猶毋過你共想喔
伊是會大喔 你是會老喔
最後你的地位會漸漸仔煞失去喔
這這這 郡主
郡主 不幸我囝已經落塗矣
郡主 你敢會用得予阮母仔囝
見面一下呢
這 唉 年祿 抱去予伊看覓咧
好 來 嗯
來啦 恁囝提去看
好
抱予好喔 毋通落去喔
啊 我囝 我的囝
果然佮老爺仝款 生做眉清眼秀
欸 嗯 共伊看一个斟酌
額頭中央閣有一粒紅痣啊
我的囝
好矣好矣 毋通看遐久 來予我
郡主啊 來來來 你先抱咧
我共你講喔 這个乎
我先共關咧柴房 咱才來討論
喔 好 𤆬去
春花 行 佮我來去
哎喲 我的囝 我的囝
郡主啊 這大隻的解決好矣
啊這細隻的這个囡仔欲按怎
是啊 這个囡仔是欲怎樣啊
是欲怎樣發落咧
無按呢好無 這个囡仔才出世爾
下晡咱彼豬槽的豬猶未食
抑無我共這擲入去豬槽內底
這囡仔閣有一个臭腥味
無確的這群豬會共這个囡仔
規个哺哺吞吞落去
啊 這
按呢這號代誌就神不知鬼不覺
這
較免留一个禍端喔
按呢敢好
好啦好啦
好啦好啦 你抱去 你抱去
好 來交予我 郡主 請
行 予你來飼豬 閣叫
予你來飼豬啊乎
豬槽佇這爿 來
我來共抱去飼豬
共你擲落去 嘿咻
好好好 轉來轉來 嘿嘿嘿
年祿啊 你心肝哪會遮爾仔狼毒
做人的奴才
你今仔日也敢煽動郡主
欲將咱年家後望的宗嗣
就按呢共斷絕
天啊天 你都也予年祿一个報應
我欲趕緊咧 來去豬槽
共小主人救起來 共救起來
小主人啊 這个囡仔
是到底欲來共抱去佗位咧
抱來去予春花都也袂用得
老爺閣猶未倒轉來
對郡主閣也無交代
按呢是欲按怎咧
啊 有矣 有矣
彼乎 我準備用彼長衫共包起來
偷偷抱轉來予我的老牽手
用彼个糕仔餅浸滾水就共飼
這是我的小主人呢
日後若是有彼个機會
會當完成𪜶爸囝的團圓
這也是我為奴一點的盡義
好好好 我就按呢共拍算啊
嘿嘿嘿 郡主有請
唉
啟稟郡主
年祿啊
我已經共彼春花乎 關咧柴房矣啦
春花關柴房
是啊
囡仔也抱去豬牢
無毋著
哎呀 可是老爺若是倒轉來
猶原也是為著無後嗣來怨嘆
我是欲如何是好咧
嗯
年祿啊 你敢有啥物好計策
郡主 做你放心啦
我會盡著我年祿
愛年家做奴才的義務
我對咱老爺是盡忠
對郡主你是盡節
我為奴今仔日欲來盡義
你 你是欲怎樣盡義
毋敢掩瞞郡主你
阮查某人昨暗才生一个查埔的
抑無按呢啦 郡主
你用長衫假一个腹肚
若老爺轉來 你就比予看
講你腹肚已經有身囉
老爺一定真歡喜
彼个時陣你就大聲哀細聲叫
哎喲 腹肚疼 疼喔
我才共老爺講
喔 一定是郡主你得欲生矣啦
阮查某人閣會曉抾囡仔做產婆
向時我的骨肉
才叫阮牽手用長衫共崁住
入來去郡主的房間
講是郡主你生的
若我甘願共我的囡仔
來讓渡郡主你
按呢就是為奴盡義啊
哎呀 妙啊妙啊 真是好計策
年祿啊
嗯
這个代誌假使若是成功
嘿
你的功勞不少
我會在我的父王的面頭前
牽成你一官半職可做啊
哈哈哈
哇 按呢真萬分感謝郡主你
郡主啊 較緊 趕緊去準備
共舊的長衫假一个假腹肚
緊去
好好好 我來去準備 我來準備
嘿嘿嘿 唉 郡主啊
若講你巧 我實在毋相信
嘛是如此如此而已啊
今仔日我年祿的血統
甘願讓渡予你
別日這个囡仔
嘛是靠阮翁某來共晟大的
囡仔若大漢 去學堂攻書
我才來對伊講
你就是阮翁某生的
將來的財產就攏是我的
年祿 年祿啊
喔
緊來 你共我看覓咧
我 我按呢敢有成
喔 郡主啊 哈哈哈
莫怪你哪會遮巧唅
喔 按呢看起來足足十個月矣
報
啥物代誌
郡馬回來
啊 老爺回府
哈哈哈 你看你看 有拄好無
我的計策誠好
現在老爺也已經轉來囉
是啊 迎接
迎接喔
拜見老爺
郡主毋免重禮
老爺南邦封王回來 一路辛苦了
彼該是當然的 郡主
但不知岳母親大人的病體如何咧
託天庇佑 母后病體安康
老爺
郡主怎樣是無
老爺 你看
喔 懷孕
是啊
咦 郡主我問你
你的懷孕是從何而來
這這這
老爺 老爺 郡主這个身孕乎
已經十個外月矣啦
十個外月 啊就奇囉
人是十月日 十月懷孕才有可能
哪會超過十個外日
有啦 老爺 是按呢啦
謼 郡主今仔日有這个身孕
就是上天知影老爺你做官盡忠
天賜麟兒啊
啊 是啊
嘛有人是十一個月才出世的
有人拖較慢 十二個月才出世
這是天送貴子啊
哎喲 哎喲喂呀
老爺老爺 你看你看
郡主可能是囡仔就欲出世矣啦
我的腹肚真疼 哎喲 緊咧
哎喲 真疼
阮牽手佇附近做產婆啦
我去叫阮牽手來鬥相共
緊咧緊咧
哎喲哎喲
趕緊入房鬥相共
春花 春花
老彥公
老爺 你倒轉來矣
是
抑無春花現此時咧
春花呢
老爺 你若欲看春花
綴我對遮來 對遮來
頭前帶路
老爺老爺 對遮來對遮來
老爺 對遮來
春花
啊 老爺
春花
老爺
嗯 我欲南邦封王時陣
你 你的腹肚咧
我 老爺
遮來 遮來
老爺
啥物 郡主你
欸 老爺 你為啥物來柴房呢
這 這
這 這是為啥物
這
老爺
內監奉旨傳口詔
老爺
年福
年福在
趕緊備香案接口詔
我來去攢 我來去攢
春
老爺 請
老爺
老爺
老爺
啊 罷了
謼 這春花誠可惡呢乎
你看 按算老爺轉來乎
就佇老爺面前按呢使弄是非
郡主娘娘啊 這个春花遮爾可惡
不如
欲怎樣啊
按呢按呢 按呢按呢 乎
好 若按呢就由你打算
遵令 嘿嘿
