說唱者：楊秀卿；伴奏樂器：月琴(楊秀卿)

〈七字調〉

姜女來到道人菴，道人卜卦真靈感，趕緊入來問一卦，欲問阮翁去出外，到底毋知是死亦活，

「口白」

道人坐落排卦詩，娘子聽我說透機，恁翁某時某月來出世，伊是叫做啥名字，趕緊共我來通知，

〈南光調〉

姜女抓話著應伊，阮翁杞良親名字，

伊是相龍來出世，正月十五正丑時，

「口白」

聽著八字排便便，聘請文王鬼谷仙，排出真卦來出現，指點弟子應該然，

〈江湖調〉

手提籤筒來搖動，聘請童子珽東王，請欲鬼谷先生公，卜欲一卦順威風，

〈江湖調〉半講唱

手提籤筒搖震動，欲問姜女去找翁，

田嬰挭著蜘蛛網，即款我想你毋免去囉，你去長城無彩工，娘子啊

你是在問恁翁出外生死的代誌，若照即个八字共伊排起來找起來，田嬰挭著蜘蛛網，恁翁一定是死囉無醫，你長城毋免去，你去是加了工

〈唱調〉

姜女聽著氣沖天，侾肖王祿騙我錢，找有阮翁來相見，弄破牌匾討卦錢，膽包天狗畜生，烏白亂講騙人个錢，我毋信你，

「口白」

好好好，你免受氣，如果咱來打賭，揣恁翁會當轉去，相娶轉鄉里，我卦錢免討加給送還你，一圓賠二圓，十二賠二四，絕對無異議。

姜女聽著應一聲，無愛講話趕緊行，我無愛聽你啦！

喂喂，查某囡仔人恰北北，你敢毋相信隨在你。