大明節孝-賊強戲鑾英 

說唱者：楊秀卿；伴奏樂器：月琴(楊秀卿)

〈七字調〉即歌按下慢且來講，賊強著是陳奇伊个親同，我个心肝想甲欲懂憨，欣羨阮彼囉鑾英真巧妝，

〈七字調〉欣羨鑾英誠標誌，心肝思想不離時，陳奇今年已經死，央三託四欲去求伊，

〈口白〉賊強計智真𠢕用，央三託四欲袂成，鑾英个人做真正，節烈兩字顧遮清，

〈都馬調〉賊強心神用一賴，鑾英你个心肝閣袂得活，講伊願守金枝會得長大，甘願艱苦受拖磨，

〈都馬調〉賊強个人真歹心，不時不入著想淫，袂得鑾英睡仝枕，歸暝目皗著金金，

〈都馬調〉賊強心內我有打算，衫褲穿好著出門，我親身著來去佮伊問，嫁翁嫁婿才有久長，

〈江湖調〉賊強一時行來到，趕緊越入去鑾英兜，看伊抱囝佇在哭，賊強才在想空頭，

〈江湖白〉哎呀，二嫂，賊強假意才勸伊，守節兩字是無了時，二哥不幸是已經死，閣嫁通晟恁囝兒，

你想看莫咧，二哥今死是無所望，我予阿嫂你做翁，若欲食穿著穩當，予你通好快活，免得艱苦濟寡，予你享福一世人，

〈口白〉強叔你聽我說起，你講即款不合宜，你無想親同个兄弟，講東講西是無了時，

你个翁婿已經死囉，我遮銀兩提兩百，予鑾英你安家，日頭過午毋是早，緊提去？米佮買柴，

恬去！ 人我个翁婿拄才死，即款做法不合宜，甘願為夫守節義，錢銀較濟我嘛無愛治，

人我錢敢有提出都絕對無閣收入啦，兩百囥佇妳桌仔頂，鐵人來講都無情，代先共你包食穿，後日才閣八百鬥一千，

〈江湖調〉我罵聲賊強你遮臭短命，任你啥款我嘛毋驚，哎呀，夫君呀夫君，丈夫你陰魂著有靈聖，我毋願敗節來臭名，心肝喂，

本境家內个灶君，即嘛知影講你即个大膽賊強，如此酷刑，我今緊奏逆君命，趕緊上天奏旨來耶～