跳到主要內容區塊
:::
楊秀卿唱〈廖添丁打扮客婆〉
廖添丁打扮客婆
說唱者：楊秀卿；伴奏樂器：月琴(楊秀卿)、大廣弦(楊再興)；使用曲調：江湖調、七字調
〈口白〉添丁即嘛若行若怨恨，畜生啊！按呢攏共恁爸款去，也無留甲一箍銀，人情義理是全無分，日後絕對予你艱苦吞。
即嘛暫時予你快活用，即个數底日後才來佮你窮，我絕對毋相信你外本等，
你會飛天佮會鑽地，你有通天个本事，我絕對無放你煞，半點我都袂同情。
〈七字調〉錢頭共我款咧做伊行，無愛言起予人聽，拍草驚蛇予人知影，不覺即嘛來到即个大稻埕。
〈七字調〉佇咧探聽大龍峒， 一位王姓大富翁，即嘛想欲來卯大檔，著買衫褲來變裝。
〈七字調〉二箍外銀來開拄好， 鬃排買來鬥下落，打扮起來無人知影伊客人亦福佬，添丁打扮做客婆。
〈口白〉講甲廖添丁會用得講，裝神成神裝鬼成鬼，即嘛打扮做客婆真大派，外人絕對看毋知，客話會講才厲害，騙講伊是龍潭拄才來。
〈口白〉扮作客婆閣真媠，骨格拄好袂傷肥，伊毋知佗位仔去探聽，去予添丁七問八問問到位，知影王姓伊某叫阿微。添丁有影另外知空，阿微上愛倩客人，去乎伊探聽著鼻目縫，講舊个下女才辭三工。
〈江湖調〉阿微伊翁叫做王振恭，伊翁仔某做人真好參詳，愛倩客人較粗勇，事頭會做人閣盡忠。
〈江湖調〉拄著一日過晝後，添丁問來到伊兜，講伊坐車拄才到，手裡包袱仔閣挔一包。
創用CC姓名標示 3.0 台灣及其後版本(CC BY 3.0 TW +)
複製授權引用資訊
基本資訊
關鍵詞
0則留言
本網站使用Cookies收集資料用於量化統計與分析，以進行服務品質之改善。請點選"接受"，若未做任何選擇，或將本視窗關閉，本站預設選擇拒絕。進一步Cookies資料之處理，請參閱本站之隱私權宣告。