Chit份資料是台灣基督長老教會傳教師總會（簡稱傳總）所發刊ê不定期刊物，本資料ê內容上代先是會長張逢昌寫ê〈發刊詞〉，講起「傳總」今年已經10年，除去八七水災hit年無聚會以外，ta̍k年lóng有聚會，今年算是第9屆，今年ê主題是「教會kap教育」，chit期有刊印3篇講師ê講稿，另外也講tio̍h對今年ê會議，一寡感想、檢討kap感謝ê話。講師ê講篇有：Tēⁿ Choân-seng（鄭泉聲）〈教會kap主日學〉，1895年了後，日本政府禁教會ê小學仔，所致教會tī禮拜日聚集囡仔來教聖經kap白話字，che就是台灣教會主日學ê開始，1917年創設主日學部會，也決定採用國際統一教材，是大進步；現今世界主日學已經進入教育學te̍k大進步ê階段，咱ê主日學tio̍h再檢討，tī人ê需要、教會kap教育使命、主日學ê目的、教會kap家庭、信徒訓練等koh再思考、長進。Sòa落是So͘ Thian-bêng（蘇天明）〈教會kap長執ê教育〉，長老教會ê長老制度是根據聖經，繼續使徒時代ê教會組織ê，總是現時教會有俗化ê現象，bē記得使徒時代ê制度，誤認「長老」ê職份，beh管理支配教會，所以咱有需要根據聖經koh來研究，koh再對初代教會來學習。Koh 1篇，〈宣講上帝ê話：講道ê基本問題〉，講道（káng-tō）就是用上帝ê話做主體，宣講者tī hia行使聽kap講ê行為，每1 ê受交代去宣揚上帝ê話ê人，對講道ê問題ài深刻ê檢討kap反省，求聖神引chhōa咱chiâⁿ做上帝ê話ê欽差，來完成上帝交代咱ê使命。後面ê〈追悼詞〉是張逢昌牧師主理ê追悼禮拜，teh siàu念過往ê信仰先輩，m̄-nā追悼先人也koh 1 pái來反省現時tī戰場ê傳道者，工作kám有辜負所受ê召命，實踐做1 ê「好koh盡忠ê奴僕」；另外，列名追悼「Tī chit屆ê中間升天ê先輩」，有：Tân Khēng-kâu（陳瓊瑤）牧師、Âng Kim（洪金）先生、Lîm Chheng-liâm（林清廉）牧師、Ko Kim-seng（高金聲）牧師。Sòa接是中文ê記事：〈訪問北市教會，導遊烏來碧潭〉、〈第九屆傳總議錄〉、〈第十屆傳總第一次委員會議錄〉、〈傳教師總會章程〉、〈傳教師總會會計報告〉、〈本年度傳教師總會負擔金未繳納教會名單〉、〈相助會弔慰金領取人名單〉、〈傳教師相助會章程〉、〈傳教師相助會員名冊〉、〈傳教師總會會員名單〉，最後是本屆傳教師總會ê職員。（文/Bo̍k ilī）