Chit份資料ê內容是第960期《教會公報》kap第167-168期《瀛光》合刊ê特刊，主要是為tio̍h「基督教在台宣教100週年及公報社80週年紀念」。《教會公報》ê部分台語白話字書寫有：專寫： N̂g Bú-tong（黃武東）〈講ê無--去，寫ê留--teh〉，講文字書寫ê要緊，上帝ê啟示，主耶穌ê教示、使徒彼得所講ê、保羅傳ê道理，lóng因為有書寫、有記錄chiah thang留kàu今仔日，教會ê歷史資料也是án-ni；總講，「講ê無--去，寫ê tī--teh」，ǹg望諸位讀者tio̍h讀，也tio̍h寫，寫做1本冊，也thang寫tī公報裡，就你所寫ê beh留teh kàu 2065年ê時beh chiâⁿ做寶貝ê文獻。對第3~27頁是各界kap海外寄來ê 祝詞；Koh有總會議長致詞：N̂g Chiong-hui（黃彰輝）〈百週年慶祝大會ê致詞：紀念kap應允〉，伊引用摩西對以色列百姓講：「Tio̍h紀念chit日...，chit日lín tio̍h進前去...，將來耶和華chhōa lín進入hit ê出奶、流蜜ê地」3句話做勉勵；Ǹg望ta̍k家 tī百100週年大典m̄-nā聽tio̍h chiah ê話，koh重新tī心內接受主ê應允，來服從主ê命令。接sòa是專論2篇，Iûⁿ Sū-ióng（楊士養）〈教會kap公報〉，講公報ê沿革、公報ê目的kap對教會公報ê希望；Iông-bêng譯ê〈宣教方策研究〉，宣教ài突破傳統te̍k ê宣道法，tio̍h是信徒ài出去tī社會生活中，tī hia來宣揚聖ê信息，信徒tī生活中講出福音，tī多元te̍k社會中hō͘ 教會kap歷史ê主saⁿ-kap前進。小傳1篇，Khu Thian-teng（邱天登）報〈故Lí Sēng-gô（李乘鰲）牧師〉。Koh來是歷史：Lí Ka-siong（李嘉嵩）寫，Âng Chín-hui（洪振輝）譯〈台灣教會所tú--tio̍h ê khún-tio̍k〉，回想早前宣教所tú--tio̍h ê迫害，有當地住民ê攻擊、「通蠻」、「通敵」ê誣賴，致kàu傳道者、信徒受害，也tú-tio̍h政治介入侵犯教會學校ê自主、強佔、強買校產、病院、土地等ta̍k項khún-tio̍k kap困境，taⁿ beh慶祝百週年ê時，tio̍h siàu念前代chiah ê人所tú--tio̍h ê悽慘，án-ne thang堅固咱ê心。論說：Tiuⁿ Hông-chhiong（張逢昌）〈Beh cháiⁿ-iūⁿ造就人才〉。詩歌1首：Siau Kî-têng作〈慶祝百週年ê歌〉。後面是百週年紀念寫作比賽入選作品，文藝組第二名：Liāu Sūi-lú〈Khioh-tio̍h ê性命〉，是1篇5幕ê劇本，主角Chó-chì (Gorege) 細漢ê時伊ê老母（烏人婦女）hō͘ 土匪lia̍h去，伊hō͘ Se-bûn夫婦khiok去扶養，koh hō͘ 伊受教育，Chó-chì讀kàu大學，lóng是ná做工賺錢來完成學業；畢業了，受基督教農業改進學院邀請去美國南部幫贊當地ê烏人kap農業，Chó-chì所做ê工，受chē-chē人敬重，連Lô-su-hok總統也表示敬意，Chó-chì表示：「主ah！我是用一隻馬換來ê性命，你iáu無看輕我。Oh！感謝主，o-ló主，tio̍h將一切ê榮光歸hō͘ 耶和華，歸hō͘ 耶和華。」；其他koh有Siàu念故人2篇：Tiuⁿ Sìn-tek（張信得）牧師媽過世，　2. Si Siau--sī Siû女士過世。 2位信徒別世ê消息。後面是：公告kap消息，以及彌陀獻堂、屏東海豐定礎式、澎宣七美獻堂ê相片。本資料另外一pêng ê《瀛光》是中文，其中有：蔡培火〈台灣傳教百週年紀念最好禮物〉；許牧世〈教會作戰的目標〉；總會議長：黃彰輝〈百週年慶祝大會致詞：紀念與應許〉；李嘉嵩〈臺灣基督教百年簡史〉；總會山地幹事：卓信得〈過去與現在的台灣山地教會〉；百週年紀念徵文入選作品第二名：一帆〈第二世紀宣教方針之我見〉；第三名：廖上池〈應如何做第二世紀之信徒〉；秋寒〈許有才牧師與倍加運動〉；董英義〈歷史資料展覽會觀後感〉；翻譯劇本，〈吾心如焚為爾殿〉，原作：Doroty Gayera；李弘祺〈專論：宣教第二世紀—基督徒應如何關心歷史（五）〉；內外教報：各教界消息；集體創作：〈回顧與展望〉；〈先慈事略〉，劉華義牧述，記者張順惠筆錄；〈我所愛的良三〉，李長老奇珍博士之三男游泳中突然去世。（文/Bo̍k ilī）