Chit份資料ê內容有：卷頭詞：Tiuⁿ Hông-chhiong（張逢昌）〈改革是對ka-kī〉。Koh來是講座：有Gô͘ Chheng-ek（吳清鎰）〈舊約聖經各卷的總論—第十章：列王紀上下卷〉，本文用：1.本書ê名稱、2.本書ê目的、3.本書所包含ê時代ê特色、4.本書ê內容區分等主題來做導讀。Lîm Gio̍k-tiân（林玉田）〈新約聖經各卷的總論—第九章：哥林多前書〉，用：I.哥林多城ê歷史、II.哥林多教會ê成立、III.寫chit張批ê事情、IV.內容概要、V.哥林多前書ê要緊，chia ê主題來做介紹。接落去是〈幼稚科〉kap〈兒童禮拜〉ê禮拜指導：〈幼稚科〉由幼稚教育小組編寫，chit期總題：「咱感謝上帝」、總目的：「幫贊小朋友歡喜上帝ê世界。」；每禮拜ê內容koh有：詩歌、聖經、金句、準備（教材、教具、佈置等準備）、引起動機（課程進行）、故事、故事後ê活動等教案設計。〈兒童禮拜〉ê部分是：「金句ê故事」，由Lōa、S. K.等幾位負責編寫，ta̍k禮拜ê有：金句kap故事。分科ê教材：分做〈初級〉kap〈高級〉2 ê科班，每禮拜課程大約有設：題目、聖經（經文）、目的kap課程ê進行。繼續是成人家庭教育科，有2篇：Keh Hô-lia̍t（郭和烈）〈聖會〉，教理ê講解；解說「聖會」tī使徒信經有講tio̍h：「Koh信lóng總ê聖徒合做1 ê聖會」；Tī聖詩內底也有：「耶穌聖會上帝設立」；Tī chia ê「聖」是指「神聖」，教會是屬tī上帝ê，所以稱做「聖會」。另外1篇，Iûⁿ Sū-ióng（楊士養）〈家族間ê調和〉，對古早kàu現今，tī家庭kap家族間不和ê實例算bē了，家族間ê調和真要緊，也真寶貴，內文用1.家族間不和ê原因、2.調和ê方法，來做分享；路尾用2 chat聖經ê經文ê教示koh再提醒。最後是故事1篇，Tân Kong-hui（陳光輝）〈戴羊皮ê豺狼〉，配合俗諺：「害jîn即害己，害tio̍h ka-kī死」。（文/Bo̍k ilī）