Chit份資料ê內容有：卷頭詞：Tiuⁿ Hông-chhiong（張逢昌）〈主日學和祝聖誕〉，勉勵主日學老師對救主ê降生ài代先有感覺，chiah ē-tàng教學生，也期待ē-thang hō͘ 聖誕慶祝會chiâⁿ做祝聖誕ê佈道會。Koh來是「教員養成講座」2篇，1篇Gô͘ Kong-bêng（吳光明）〈基督教教育kap馬槽〉（接頂期），聖誕kàu lah，咱做先生ê tio̍h koh再深思聖誕ê意義。另外1篇， Iâu Chèng-tō（姚正道）〈猶太ê風俗kap習慣（11）〉，chit期紹介「音樂」，有講tio̍h：「I.猶太人對音樂ê興趣；II.聖樂教育；III.樂器ê種類」chit幾項。繼續是主日學ê教材：Tiuⁿ Chheng-kiⁿ（張清庚）編寫ê〈兒童講道的指針及分班時的教材〉，12月ta̍k禮拜ê課題，分別是：12月6日：〈幫贊1 ê新反悔ê人〉；12月13日：〈彼得曠闊工程〉；12月20日：〈Beh hō͘ 世間ê福音〉；12月27日：〈上帝，咱ê幫贊〉，課程教案參考是：金句、目的、講道，了後進行分班課程有：聖經、頭序、本論、結論。接落去是Chhòa Khái-tông 作ê 1篇聖誕劇ê劇本：〈聖誕ê禮mi̍h〉，講起2 ê sàn-chhiah ê兄妹仔，出tī疼心幫贊koh照顧1 ê老乞食，實行基督「Lín 若疼tī至微細ê就是kiâⁿ tī我」ê教示，所以tī in奉獻ê時，禮拜堂ê鐘聲大tân，象徵上帝歡喜in ê好所kiâⁿ，也接納in誠心ê奉獻。後面2篇是中文書寫ê：〈T.K.C.例會指導〉（依照本年T. K. C.手冊），由中國主日學協會所編寫。任賜美〈在教會幼稚用的詩歌〉，透過唱歌hō͘學生對細漢tio̍h明白基督ê真理。最後是Tiuⁿ Hông-chhiong（張逢昌）〈編者ê話〉。（文/Bo̍k ilī）