Chit份資料ê內容thang講是使徒行傳各章ê摘要，聖經是基督信徒足重要ê經典，基督徒信「聖冊lóng是上帝默示ê」，使徒行傳ê要緊，是信徒tùi讀4本ê福音傳，來bat耶穌ê來歷，了後也tio̍h讀行傳，kap使徒所寫ê批以及默示錄，thang講究救世真理，知古早教會ê來歷。使徒行傳記載救主耶穌chiūⁿ天了後，託tiōng hō͘ 伊ê使徒，所做ê代誌，來設立興起主ê教會。本資料ê內容thang分做2大部分，頭前第1～12章有人講是「彼得行傳」，是講耶穌升天了後，伊ê學生彼得kap其他ê門徒因為有聖靈ê降臨，hō͘ in好膽為基督教信仰辯護，koh有信心大力ǹg外做傳福音ê事工；其中也有講tio̍h司提反殉道ê經過kap掃羅迫害教會後來改變歸主變成保羅ê事。使徒行傳第2部分（第13~28章）有人講是「保羅行傳」，是講使徒保羅將福音ǹg外邦傳佈ê故事，所記主要是保羅3 pái旅行宣教ê歷程，ta̍k pái lóng有hō͘福音tiâu tī在地開花結實，hō͘早期教會宣教ê工作ē-thang 快速擴大ê成果；其中也有簡介保羅ê生平kap佈道過程bat受lia̍h關監ê代誌。（文/Bo̍k ilī）