Chit份資料是朱約安姑娘（Miss Joan Stuart） 和文安姑娘（Miss Annie E Butler） 所翻譯ê，lóng總10篇，有中國ê mā有其他國家ê故事，內文是teh做傳教見證故事khah chē；比如：〈Cha-bó͘ 囡仔干證耶穌〉，講1 ê 叫 Kài-á ê中國 cha-bó͘囡仔名，tùi 聽見耶穌 ê 道理了後就 深信，愛beh 受洗禮；m̄-koh受伊hit-ê秀才老pē嚴厲koh phah罵ê阻擋 ， m̄ hō͘ 伊受洗禮入教；Kài-á無驚艱苦，勇敢見證主ê道理，hō͘ 老pē態度改變，soah koh引chhoā 序大人來 bat 耶穌，入 上帝 ê 國。〈盡忠kàu死〉，講1 ê tī 亞非利加洲ê 烏面 人Chā-lí，tùi 聽道理了後心真欣慕 chit ê 教示，醒悟信救主，知伊屬 tī 耶穌，就回應beh甘願 tè 主，koh 無顧傳染病ê風險，暝日歡喜顧病人，beh chhoā in來信主耶穌；Án-ne盡忠做工kàu死。〈為主受難〉，講tī中國義和團時期發生ê代誌，1 ê叫做Phàng-á ê信徒hō͘土匪lia̍h去beh kā 活埋；M̄-koh，Phàng-á  lóng 無 驚，反tńg直直講道理 hō͘  in 聽，土匪受氣用塗thūn kàu tīⁿ；Án-ni疼主ê Phàng-á甘願為主phe命。另外，也有對細囝論基督徒生死觀ê故事，比如：〈1 chân故事〉，講1ê 8歲ê囡仔「仁愛」破病足久，真驚ē死，老母安慰講，醫生講伊ē漸漸好；也koh kap伊談論死ê代誌，講死ê時是親像搬去新厝一樣，咱死就是搬去天Pē ê厝；心得tio̍h安慰ê仁愛講：論chit-ê死ê代誌，無koh hō͘我驚lah。其中也有未出版冊進前ê翻譯文稿bat tī教會公報刊載；比如：〈雅各去見tio̍h女王〉，教會公報第63張（1890-08發行），〈代先升天m̄是失落〉，刊tī教會公報第73張（1891-05發行）。（文/Bo̍k ilī）