Chit份資料是閩南基督教女宣道會創設10週年ê紀念刊物，講起該會設創ê經過、各工作區kap分會ê事工概況。內容上頭是Sím Siō Iú-bûn所寫感謝上帝ê「序言I」，「序言II」Hok Ì-bō͘ 所寫〈女界tī上帝教會ê位置〉，回想女宣道會10 gōa年ê經過，是主tī chit中間所做ê是「pôaⁿ過咱一切所求、所想ê」，通過主kap女道會同在ê做工，chiah有thang tī 6 ê所在；上帝有hō͘閩南ê女界結連做伙chiâⁿ做1 ê會，也hō͘咱有特別ê權利kap榮耀thang同心為tio̍h伊ê國來祈禱、獻工kap金錢。內文第一章〈沿起kap回顧〉，其中有：Âng Sūi-soat所寫ê〈I.本會沿起〉、Hô Siok-cheng寫〈II.本會10年來ê 回顧〉kap Tân Hô-pêng寫〈蕭Jiông-ko͘ ê事略〉，簡說閩南設教將近100年，iah女學也有60年ê歷史，總是kàu kah 1925年，因為Jiông-ko͘ 得tio̍h福音ê經歷chiah開始有開設婦女宣道ê事工。第2章：〈本會ê工作區〉，閩南女宣道6 ê工作區ê報告，由Tè Pó-pòe寫〈I. Chhiⁿ-phó͘傳教ê經過〉、N̂g Èng-kiû寫〈II. Chiàu-an（詔安）教會ê消息〉、Ngô͘ Sò͘-chhiu kap Ngô͘ Kim-siúⁿ寫〈III. Lio̍k-gô ê消息〉、Bi̍t Lō͘-tek寫〈IV. Tn̂g-piⁿ ê消息〉、Chhòa Ho̍k-chho͘ 寫〈V. Tōa-tin（大陳？）ê消息〉、Khó͘ Ka-un kap N̂g Ông Sûn寫〈VI. Ē-tàiⁿ ê消息〉，報告各區ê概況kap分享傳教過程。第3章是各分會ê報告，有〈I.泉州分會〉、Tân Cheng-kiat寫〈II.漳州分會〉、Kip牧師娘寫〈III.同安 分會〉kap〈其他分會〉等分會ê概況kap〈會員kap經濟ê 比較表〉分析。第4章是女宣道指導者ê贈言5篇，對女宣道會ê勉勵kap肯定，有〈I. 本會顧問Chiu Chi-tek牧師對tī女宣道會ê言論贈言〉、〈II. Ek Hô-an Bo̍k-su牧師ê 贈言〉、〈III. Au-iông Hô͘牧師ê贈言：「我對tī女宣道會ê印象」〉、〈IV. Ngô͘ Péng-iāu牧師ê贈言：「我對tī女宣道會ê感想kap希望」〉、〈V. Kip Ek-un牧師ê贈言：「女宣道會工作ê緊要」〉，最後是第5章：〈會員芳名〉kap第6章：〈10週年靈修會演講錄〉，chit kái靈修會總題是：「耶穌基督kap伊ê十字架」。最後Tīⁿ Sûn-kiat tī〈編後ê話〉，講tio̍h女宣道會成立10 gōa年，開設Chhiⁿ-phó͘、詔安、Lio̍k-gô、Tn̂g-piⁿ、Tōa-tin kap Ē-tàiⁿ 等6 ê工作區，會員有千gōa人；雖然tī非常時期，總是會務猶原積極進行；本刊本然tī 1937年就tio̍h出版，因為時局ê影響延chhiân kàu現在；本刊bōe免有無夠ê所在，ǹg望saⁿ原諒。另外，tī頭前有1首〈10週年紀念歌〉。（文/Bo̍k ilī）