Chit份資料是屏東排灣族ê傳道簡史手稿影印本，thang對1946年1月1日屏東教會Khó͘ Iú-tsâi（許有才）牧師招集教會青年tòa 1包鹽代先去tī Soaⁿ-ti-mn̂g（山豬毛）來訪問、視察山地開始開路。後來招募N̂g Sò͘-ngô͘（黃素娥）做伙來做工，代先入Soaⁿ-ti-mn̂g做教員，ná教冊，ná傳教；到kah 1948年9月黃素娥chiah駐在tī山地做傳教ê工，到1950年9月就參詳beh起禮拜堂，就是「三地門教會」。Tī排灣teh傳道也有培養當地ê青年做傳教者，陸續開拓ê教會有：Má-jî Kàu-hōe （馬兒教會）、Ta̍t-lâi Kàu-hōe（達來教會）、Liâng-san Kàu-hōe （涼山教會）、Má-ka Kàu-hōe（瑪家教會）、Kháu-siā Kàu-hōe（口社教會）、An-pho Kàu-hōe（安坡教會）、Sài-ka Kàu-hōe（賽嘉教會）、Pâi-oân Kàu-hōe（排灣教會）、Tek-bûn（トクブン）（德文教會）、Ka-gī Kàu-hōe（カキギザン）（佳義教會）、Soa-bô͘ Kàu-hōe（サモハイ） （沙漠教會）；除了tī排灣傳教以外連隔壁屬ルカイ（魯凱）族 ê Bū-tâi-hiong（霧台鄉）ê Hó-tê-chhoan（コチヤボガン）（好茶村）kap Bū-tâi-chhoan（霧台村）mā有開設教會。內頁有附1張1954年6月所做，chiah-ê教會ê教勢一覽表。Tī傳教ê過程中得tio̍h：屏東教會、高雄中會高山傳道部、Bûn-lo̍k-hōe I-liâu-thoân （門諾醫療團）、山地診療所kap宣教師Hoâi Sian-siⁿ（就是Hoâi Iok-hān （懷約翰，John Whitehorn）好ê幫贊。最後koh紹介「排灣族ê風俗、習慣」：做親、親事ê成立、結婚式、葬式、承接家業、In ê宗教、In ê迷信kap生活ê禁忌。（文/Bo̍k ilī）