Chit份資料是澎湖Má-keng教會1位盲人青年ê見證集，內容上起頭是當時ê駐堂牧師Lô͘ Un-hūi（盧恩惠）〈介紹ê話〉，koh來是作者Ko Tiong-hok（高忠福）ê〈頭序〉，接落去是見證集ê主文，分做4部份：〈全家ê見證〉，作者對三代前開始講起，in ê祖先真chē代lóng是信佛教，koh細漢時生活困難，厝裡tú-tio̍h病疼tio̍h去chhōe民間療法抑是去宮廟問神明，總是lóng無法度；Chhàu-tú-khám，tú好有人將基督ê信仰報hō͘ in，koh經歷一段反複ê魔鬼苦楚kap試煉了後，經驗tio̍h信主得平安，路尾全家lóng信主ê見證。Koh來是〈我本身ê見證〉，講本身生活tī烏暗當中ê心境、自細漢kàu大漢爭取beh去盲啞學校讀冊ê經過、tī盲啞學校讀冊ê經歷，體驗tio̍h主恩奇妙ê攝理，為主做工ê決志。〈Tio̍h疼人親像ka-kī〉，作者去到ta̍k所在做見證ê經歷，也koh再體驗上主無kāng型式ê疼kap作為。最後是〈上帝ê疼〉，pē母ê疼是世界偉大ê疼；總是上帝ê疼koh khah大，tng人犯重罪ê時，上帝iáu留悔改ê機會hō͘咱，ǹg望罪人悔改；若無悔改，死後伊chiah審判；Iáu-koh 1項疼ê表現，就是上帝將伊ê獨生囝賞賜咱，為咱擔當罪，受釘死tī十字架頂；Koh講tio̍h耶穌ê疼，伊為世人ê罪受十字架酷刑，伊流出寶血，洗清罪人ê罪，hō͘見若信伊ê人lóng有份伊ê救贖；是作者對教理默示tio̍h ê見證。（文/Bo̍k ilī）