Chit份資料ê內容有：畫2幅，消息3條，文章3篇。頭一頁有亞洲基督教藝術圖畫1幅kap消息報導：〈1990 地球日〉。〈宗教界關心地球〉。〈總統民選聲明〉。第二頁ê專欄：氣象台，Chiu Kim-choân（周金全） Chîⁿ ēng--chhut-khì, chiah ū kè-ta̍t〈錢用出去，才有價值〉，將錢用tī幫贊、利益人ê事工，就無白白浪費，án-ne chiah有意義。下面有Hô Khek-lé（何克禮）畫ê báng-gah圖1幅，是對1990年4月初1 ê《教會公報》翻譯〈台灣人禮拜ê所在〉。本期主題：〈恐怖，危險，夭壽．核能發電〉，本文是對「台灣環境聯盟」所出版ê《揭穿核電的神話》chit本小冊節譯出來，主要針對經濟部、台灣電力公司kap擁護核能ê人所teh鼓吹核能發電，將in所鼓吹ê歸納做10條，每條後面是反對核能發電ê人對chit 10條講法ê反駁：1.核能發電廠無污染mah？2.核能發電廠安全mah？3.緊急疏散做ē到mah？4.台電án-chóaⁿ做疏散演習？5.若地動、海漲beh án-chhóaⁿ？6.核能料來源上充足mah？ 7.無起核電第4廠tō無夠電？ 8.核能發電上俗mah？9.核能廠ē帶hō͘地方繁榮mah？ 10.是m̄是起核電廠；應該hō͘政府決定？最後是靈修，〈真實ê赦免，無簡單〉，代先用猶太人ê故事做開頭，了後反省來講，若咱iáu-bōe pàng-sat咱ê自我，iáu-bōe pàng-sat愛面子ê心，iáu看重個人ê得失；若咱無真正體會主耶穌ê疼kap赦免；若咱無聖神ê幫助，當然就真pháiⁿ赦免人。（文/Bo̍k ilī）