Chit份資料ê內容有：卷頭詞：Chiā Chài-seng（謝再升）〈新年ê觀感〉，本《基督教教育》雜誌新年度ê方針，照現狀beh用在來ê國際教案，kap主日學協會連絡，用教材做中心來編輯ha̍h用ê教案，也感謝宣道社將in在來所teh發刊ê「金句ê故事」thang印tī chit本內面，hō͘ ta̍k家khah利便來得tio̍h利益。Koh來是講座：有Gô͘ Chheng-ek（吳清鎰）〈舊約聖經各卷的總論—第1章：創世記〉，本文用：「1.本書ê名稱、2.本書tī舊約聖經中ê地位、3.本書ê目的、4.本書ê計畫、5. 本書重要ê教示」等主題來做導讀。Lîm Gio̍k-tiân（林玉田）〈新約聖經各卷的總論—第1章：新約聖經ê起源kap經過〉，用：「I.新約文書產生ê事情、II.新約聖經ê順序kap意義、III.新約聖經結集ê經過、IV.新約聖經ê語言、V. 新約、舊約ê意思」chit幾主題來做介紹。繼續是囡仔ê禮拜：〈幼稚科〉，由幼稚教育小組編寫，代先交代幼稚教員應有ê認識：「1.教會幼稚科是禮拜ê所在。2. 幼稚科是囡仔禮拜ê所在，m̄是大人ê」；Koh ta̍k禮拜ê教案設計有：目的、材料（教材、教具等準備）、引起動機（課程進行）、故事、故事後ê活動等。〈兒童禮拜〉ê部份是：「金句ê故事」由T. K. C.、Lōa Jîn-seng（賴仁聲）、S. I. L.、Âng Siok-kheng等幾位負責編寫。接落去是分科ê教材：分做〈初級〉kap〈高級〉2 ê科班，ta̍k禮拜課程用1段聖經（經文）來進行研究kap討論。後面是中文書寫ê〈T.K.C.例會指導〉，由中國主日學協會所編寫。繼續是成人家庭教育：Tīⁿ Liân-khun（鄭連坤）〈關係成人家庭教育〉，咱基督教教育m̄-thang kan-ta注重教會教育，的確tio̍h關心kàu tī基督教家庭教育；本雜誌對後月日beh刊載有利益ta̍k家對建設基督化家庭有幫贊ê文章。最後是Tiuⁿ Hông-chhiong（張逢昌）〈編者ê話〉，其中有提起：感謝宣道社歡喜將金句ê故事對本月起編tī chit內面；Koh對本月起主日學教材有分科。（文/Bo̍k ilī）