Chit份資料ê內容有：Chhòa Phòng（蔡椪）〈受難週ê查經〉。Iûⁿ Sū-ióng（楊士養）〈每日ê默想〉。本報記者〈Chit款ê事實你知無？〉，若有佛教徒無理攻擊咱，咱beh cháiⁿ-iūⁿ對付？Tú-tio̍h異教ê毀謗、攻撀、攪擾，tī咱ê信仰上一點仔tio̍h bōe受搖動，tī技術上、工作上，也m̄免著急抑是操心、peh-pak來beh伊做對頭；咱傳咱ê福音，kiâⁿ咱基督徒ê本份，用正確堅定ê立場，無自卑，無反動ê方法來對付，若án-ni，的確bē致到hō͘主ê名見笑，koh bē hō͘福音ê正道致到歪chhoa̍h抑是名聲受tio̍h phah lâ-sâm才對。聖詩委員〈聖詩名作ê介紹〉，本文講tio̍h Chang-chhiū-ki choeh（棕樹枝節；PALM SUNDAY），用聖詩106 kap 107首特別合tī hit日ê禮拜；接落去是介紹聖詩第110首受難聖曲「聖主頭額taⁿ受傷」，講chit首聖詩ê作詩者是Sèng Pek-ní-ná伯爾拿（Bernard of Clairvaus 1019-1153）、作詞者 Hā-su-lah哈斯拉（H. L. Hassler 1564-1612），也寫幾點關係chit首聖詩ê唱法提供做參考；後壁是聖詩131首ê介紹。 Si̍p-sūi-seng（拾穗生）《Khioh麥穗》（第11期），本期文章有：〈詩篇第七篇ê 研究〉，koh分做：A.「Sè-la̍h」ê研究、B. Hap-pa-kok （哈巴谷）ê Se-la̍h kap C.本篇人名ê意思等解說。Teng Êng-lîm（丁榮林）〈短篇小說〉，作者tī開頭代先提醒：下面ê故事由在你beh信m̄，總是m̄-thang無謹慎；內文講起教會牧師、長執kap信徒受騙ê故事，後悔無知引進豺狼入厝內（引狼入室），感嘆：「知人知面不知心，……痛心今仔日有偌chē ê基督徒是掛羊頭賣狗肉，用基督ê招牌teh做犯罪ê事，chhùi講耶穌，手kia̍h牛刀；chhùi講相疼，其實teh相拚；頭前teh祈禱，後壁teh iat lián寶；頭前teh喝感謝主，後壁有物就取」；結尾ê教理教示：「Che是上帝通過伊對咱講話：「Tī這個末世ê時代，魔鬼裝做光明ê天使，親像義ê差用，sì-kè kiâⁿ，teh chhē所thang吞食ê人，所以tio̍h警醒祈禱，chiah免入tī迷惑」。其他第8、10、11、10～24頁是是各機關、部會、各中會、教會公告kap消息，其中第11頁是〈畫報：受難ê跡kap圖片〉，第22頁有〈夏禮文夫人小傳〉，介紹前馬偕紀念病院院長夏禮文夫人（Mrs. C. H. Hollemen）ê略歷。（文/Bo̍k ilī）