Chit份資料ê內容有：編輯室傳達〈台灣地區神學院預定beh設碩士課程〉消息。接落去是內外教報，報導各機關單位公告、啟事kap各地、各中會、小區教會消息。Ông Chú-chhiau（王梓超）〈Cháiⁿ-iūⁿ起用平信徒參加宣教陣線〉，平信徒tī in ê職業所接觸ê人chē、工作範圍也真闊，若是平信徒tī伊ê工作範圍內有做「光kap鹽」，發出基督ê芳味，án-ne tio̍h已經tī無形中teh做真好傳教ê工；若有優秀ê信徒，咱thang用伊tī種種ê公職發揮in ê智慧，來貢獻tī教會事業ê進展。Ko Chiau-liông（高昭龍）〈禮拜ê意義kap實際〉，chit篇是高牧師tī傳教師總會ê演講。講壇，Kè-hô-chut譯〈謹慎你ê心〉，謹慎你ê心！Tio̍h知你一生ê成功、失敗、禍福lóng是用你ê心來做轉移；你一切kiâⁿ做kap生活，lóng是用你ê心做出發點；你ê心思cháiⁿ-iūⁿ，你ê kiâⁿ做生活也是án-ne；心思卑賤污穢，sòa ǹg望有高尚ê行為、清潔ê生活，是絕對無法度ê事。Lí Ka-siong（李嘉嵩）〈A-men sian-siⁿ（阿們先生）〉，發生tī日本ê見證故事。Ông Chhái-kí（王采芑）〈赴幼兒教育研究會感想〉，接頂期。詩篇ê研究，Tân Kim-jiân（陳金然）〈世間人是sím-mi̍h？〉。最後，Khó͘ Chúi-lō͘（許水露）〈故 Lí Ta̍t-chong（李達莊）博士〉，報導李長老達莊博士別世消息、告別禮拜kap故人略歷。（文/Bo̍k ilī）