Chit份資料ê內容是趙君影牧師ê講道集，lóng總有7篇，第一篇〈榮耀基督〉，聖神降臨ê目的是beh榮耀耶穌，唯一ê動機kap目的，是「為榮耀主」，咱tio̍h追求聖靈充滿hō͘ 咱ē榮耀耶穌。第二篇〈Piàⁿ-khang一切〉，聖靈是聖潔ê靈，只有beh充滿聖潔ê人；所以tio̍h piàⁿ-khang ka-kī kap一切ê罪惡，以及一切kap聖靈saⁿ違背、saⁿ衝突ê物件；也tio̍h tī人ê面前認罪，chiah-ē得tio̍h聖靈充滿；m̄-thang貪愛世界，tio̍h piàⁿ-khang一切、謙卑認罪、改變ka-kī ê眼光，做hō͘清楚chiah-ē hō͘ 聖靈充滿咱。第三篇〈完全奉獻〉，聖靈充滿就是靈力充滿，靈力充滿是beh hō͘ 聖靈使用ê；所以的確ài順從chit-ê靈力，hō͘ 聖靈完全tī咱ê心內做主、做王， tio̍h有1 ê完全順服ê心，chiah-ē得tio̍h聖靈充滿。第四篇〈用信心接受〉，聖靈充滿kap得救有區別：得救是1 pái得救，就永遠得救，但是聖靈充滿tio̍h時常用信心去接受，chiah ē-thang常常充滿。第五篇〈聖靈充滿了後tī信徒身上ê表現〉，有思想ê改變、意志ê進步、hō͘ 枯焦ê情感koh活起來； hō͘聖靈充滿了後，就ē戰勝死亡ê束縛，chiâⁿ做完全得勝ê人。第六篇〈聖靈充滿了後tī教會工作上ê表現〉，教會hō͘ 聖靈充滿以後，聖靈就將恩賜帶來hō͘教會，奮興各人運用chit-ê恩賜，合作運用、saⁿ發展神ê工作；hō͘聖靈充滿ê人，清楚認bat真理，同心遵守聖徒ê教訓，tī教會中熱心傳道chhōa人歸主，彼此來往，大家合一祈禱，同心合意奉獻所有，教會因為án-ni大大興旺。第七篇〈Cháiⁿ-iūⁿ叫做聖靈充滿〉，需要聖靈充滿，抑是活潑ê靈命，che m̄是人所ē hō͘ 你ê，是tio̍h個人跪落tī神ê面前懇切追求，m̄-nā是知影、明白，koh-khah要緊ê是求「耶穌teh大聲講：人若chhùi-ta，thang來我chia來lim、信我ê人，對伊ê腹內，beh流出活水ê溪河來。」ê聖經教示。（文/Bo̍k ilī）