Chit份資料ê內容是對已經絕版ê《聖冊記錄》再修sek（飾）改編koh再印ê，冊名換新，《聖經選錄》khah合本來ê意義。本冊lóng總有86篇ê聖經選錄，tī首頁有講本冊是記寫始祖亞當kàu A-pí-bí-le̍k，第1~ 22章是〈創世記〉全本ê記事，對上帝創造天地萬物，講kàu人犯罪惹上帝大受氣beh用大水來消滅世界，以及亞伯拉罕（舊名：亞伯蘭）ê家族kap伊ê一生相關ê故事；第12、13章是講以撒ê故事；第14~22章是雅各kap伊ê家族ê記事，其中第17章開始講伊ê囝約瑟ê故事；第23~27章是舊約聖經〈約伯記〉所記載義人約伯ê福氣kap伊tú tio̍h ê將近絕滅ê災厄，kàu後來koh再得tio̍h福氣ê代誌；對第28～46章所講ê lóng是tī〈出埃及記〉所記載ê故事；第47~66章所選錄ê聖經是講摩西án-chóaⁿ chhōa以色列百姓出埃及，了後，tī曠野漂流40冬，iáu-bōe進入kàu迦南地ê記事，tī hia以色列百姓建置律例，其中所選錄ê聖經有根據〈利未記〉、〈民數記〉kap〈申命記〉chit 幾本；第67~77章，是根據〈約書亞記〉所編寫ê，所記ê故事就是摩西死後，約書亞承接摩西ê職份，帶領以色列人進入迦南地，kap迦南地各族群ê爭戰，kàu平定安居ê相關記事；第78～86章，是〈士師記〉ê聖經選錄，對O-tek-gia̍p（俄陀聶）kap Í-hut（以笏）講kàu基甸，最後是記基甸ê囝A-pí-bí-le̍k（亞比米勒）ê代誌，本冊ê聖經選kàu士師記第 9章，有關其他士師ê記事編tī別冊。編者表示，tī聖經所記有歴史kap教示；教示有包含要理kap倫理；Tio̍h 是就拜上帝ê人所tio̍h信ê kap所tio̍h kiâⁿ ê，做基督徒ê，ài明白上帝ê教示，tio̍h代先ē bat聖經內ê歷史，án-ni咱聽道理、讀聖經，khah ē了解，khah ē bat上帝、疼上帝，心神品行ē日日換新；因為對歷史ē-thang看上帝ê權能，智慧、公義、疼痛、kap其他種種ê結果；聖經選錄ê內容排列簡單ê歷史，目的beh助咱接受上帝ê真理。（文/Bo̍k ilī）