Chit份資料ê內容是1963年為山地宣道紀念日所出ê刊物，紀念日ê設置是根據第5屆總會有議決將6月第3主日改做「山地傳道紀念日」；本資料封面是頭1本山地話（Tayal）ê聖經，內文文章6篇，〈山地教會〉，是處長Tiuⁿ Khun-oán（張崑遠），談論現時tī山地ê情形kap問題，宣道處ê事工目標，全年ê經費需要，請ta̍k家為山地傳教祈禱，hō͘山地ê兄姊早日完成做基督化ê民族，siāng時也請 ta̍k家tio̍h盡力奉獻tī山地傳教ê互援；〈山地宣道處ê請安kap懇求〉，是幹事Toh Sìn-tek（卓信得）所寫，代表385間ê山地教會ǹg 420間ê教會請安批，也懇求兄姐做山地宣道ê後盾，無論tī精神上，抑是物質上提供幫贊，thang完成上帝所交代ê使命；Ia̍p Pó-chìn（葉保進）〈山地中學ê重要性〉，提起設置山地中學ê要緊，因為山地人口中有去接受中等以上ê教育ê人真少，又koh天主教直直來teh起學校，吸收咱教會子弟過去，教育對山地將來ê教會是非常重要，因為若beh建設1 ê堅固ê實質ê教會，tio̍h代先教育培養人物；Ô͘ Bûn-tî（胡文池）寫ê〈追念布農族ê保羅劉傳〉，簡介劉傳牧師ê傳記，講伊是一ê偉大Bunun ê傳教者，少年bat放蕩，後來接受主，真實反悔，有新生活，koh自發teh傳道理，建設Bunun頭1間ê教會，伊真gâu講道，甚至別族ê人也真愛聽伊ê講道，伊ê kha有關節炎（Bunun話是polo），所以作者講伊「真正是Bunun ê保羅，真gâu做工。」；Ông Eng-sè（王英世）〈全省最細ê族（賽夏Saiset族）〉，介紹賽夏（Saiset）族；S. C. Lo̍h (（駱先春）〈Pyuma教會近況〉，報告Pyuma（彪馬）族ê教會ê近況。（文/Bo̍k ilī）