Chit份資料ê內容有：卷頭詞：Tiuⁿ Hông-chhiong（張逢昌）〈聖經、金句〉，主日學老師beh教學進前，的確tio̍h真清楚所beh教ê聖經ê內容kap前後ê關係，hō͘聖經ē-thang做咱教學ê中心kap結論；關係暗唸金句，m̄是pháiⁿ事，金句是對聖經摘錄，也是有利益tī in後來ê信仰生涯；Hō͘ 主日學學生唸金句，kàu真熟，hō͘ hit日ê金句ē chiâⁿ做hit日ê學課中心。Koh來是講座2篇：1篇是Gô͘ Chheng-ek（吳清鎰）〈舊約聖經各卷的總論—第六章：約書亞記〉，本文用：「1.本書ê名稱、2.本書ê目的、3.本書ê內容區分、4.本書所包含ê歷史te̍k意義、5.本書重要ê教示、6.約書亞做基督ê預備」等主題來做導讀。另外1篇是Lîm Gio̍k-tiân（林玉田）〈新約聖經各卷的總論—第四章：約翰福音傳〉，有：「I.著者、II.時間kap地點、III.目的、IV.特色、V. 內容ê概要」chit幾主題來做介紹。接落去ê禮拜指導：分做〈幼稚科〉kap〈兒童禮拜〉；〈幼稚科〉由幼稚教育小組編寫，ta̍k禮拜ê教材教案有：主題、目的、注意事項、引起動機、故事、故事後ê活動、詩歌等設計。〈兒童禮拜〉ê部份是：「金句ê故事」由E. J. K.、Lōa、S. K.等負責編寫。分科ê教材：分〈初級〉kap〈高級〉，ta̍k禮拜〈初級〉ê課程教案有：題目、聖經、喻道故事、目的、教ōa；〈高級〉ê用1段聖經（經文）來進行研究kap討論。繼續是成人家庭教育科2篇：So͘ Thian-bêng（蘇天明）〈婚約kap結婚前ê商量〉，作者對所聽見kap所看見ê的經驗，對結婚前ê青年男女雙方應該tio̍h講清楚ê幾項問題：1.健康ê問題；2.經濟問題；3.職業ê問題等；Tī婚約前tio̍h坦白商量kàu同一心志；Koh有，訂婚m̄是結婚，婚約後tio̍h保守純潔ê交陪，男女lóng tio̍h貞節清氣kàu結婚ê日，chiah ē得tio̍h幸福ê家庭。Gô͘ Chheng-ek（吳清鎰）〈基督教ê家庭觀〉，接前號57面，tī家庭tio̍h用上帝ê話做中心，saⁿ-kap建立信德，求上帝ê國kap伊ê義，來達成上帝所安排ê目標。最後是Tiuⁿ Hông-chhiong（張逢昌）〈編者ê話〉。（文/Bo̍k ilī）