Chit份資料ê內容，是teh講聖經是sím-mi̍h？聖經是上帝ê話。見若基督徒為tio̍h培養靈性，為tio̍h道理、活命，ta̍k人lóng tio̍h讀聖經。上帝ê話對列祖代代流傳，後來chiâⁿ做冊，上帝hō͘伊chiâⁿ做聖經，寫冊ê人所根據ê資料大概有：對古早人所信所傳ê、對古早ê藝術品ê印象、古代風俗ê流傳、古代ê律法、古代ê詩歌、使徒ê說教、主ê教訓集、馬利亞ê回想kap使徒所寫ê批信等。M̄-koh聖經是人抄寫ê、是聖經公會印ê，有可能印錯、抄錯、漏勾、重複等ê失斟酌，以外iáu有比如聖經經學士對神學ê立場改正、引用ê錯誤、或是採用錯誤ê歷史，tio̍h斟酌。又koh咱tio̍h讀出聖經上帝ê話，m̄-thang斷章取義，聖經ê話kap時，是表現上帝ê旨意kap伊ê權能；時是話tī講ê所在，tī hia話chiah具體化，án-ni，話kap時ê結合就形成歷史。聖經是拯救史ê記錄，chit-ê拯救ê事tī早前是託先知kā列祖講，tī路尾是託伊ê囝kā咱講ê，án-ni chit-ê拯救ê歷史一直是指向基督。Án-ni看，聖經是beh干證基督，就是hō͘咱對講究聖經，來chhōe tio̍h基督，對伊來得tio̍h永遠ê活。Koh來講舊約kap新約，舊約是指摩西ê冊是teh預言基督，新約是對耶穌ê血來設立，hō͘人對伊ê血kap上帝成立新ê關係，就是應驗舊約所teh預言拯救ê，án-ni無論舊約、新約lóng是teh干證基督。結論來講，聖經是上帝ê話，上帝在早kā列祖所講hiah-ê記載tī舊約，tī路尾託伊ê囝kā咱講ê記載tī新約。（文/Bo̍k ilī）