Chit份資料ê內容是teh講教會（特別是基督教）ê歷史，起頭對第4世紀開始講起教會tī歐洲發展ê歷史，羅馬教（天主教）ê變遷，其中有因為人ê操作致到道理失真、當執者koh pháiⁿ模樣，教皇kap國王關係緊張、分裂等原因，致使有人喊喝tio̍h進行宗教改革，因為án-ni bē少人受tio̍h迫害，真正算有成功ê是「Lō-tek Má-teng（Martin Luther路德馬丁）」ê宗教改革，也有得tio̍h支持；後來koh有Kap-lîm Iok-hān （John Calvin）倡議ê教會歸正，也推行到歐洲真chē所在，包括有瑞士國、荷蘭、法國等國家。Kap台灣長老教會真有關係ê英國長老教會歸正史就對英國ê歷史講起，歷任國王對天主教和基督教ê態度kap影響，英國教會歸正是tī女王瑪利亞死了後，歸正教設立定tio̍h，無koh有大迫害；koh有講tio̍h對蘇格蘭歸正大影響ê是Ná-su Iok-hān （John Knox），thang講是蘇格蘭宗教改革領導人。Tī英國歸正了後ê長老教對海外宣教事工有致意，1847年派 William Chalmers Burns到中國傳教，設教tī廈門kap汕頭，來台南ê宣教師也lóng是屬仝1 ê長老教所差派ê。本冊後面ê部分，講教會ê治理概況。上尾交代tio̍h 19世紀蘇格蘭ê自由ê長老教kap聯合ê長老教tī 1900年合做聯合自由ê長老教（United Free Churh），到1909年開始聯合自由ê長老教koh kap Ông-ke-kàu（就是蘇格蘭國教教會）討論聯合ê事宜。（文/Bo̍k ilī）