Chit份資料內容有文章9篇、囡仔古1篇、插花譜1篇、食譜3篇、議事錄1篇、消息3條。配合ê復活節文章有：Tân Kim-jiân（陳金然）〈 主果然復活！〉、Khu Bêng-tiong（邱明忠）〈復活ê主對啥物人顯現？〉、Âng Bān-sêng（洪萬成）〈婦仁人ah，siáⁿ事哭？〉3篇用主復活為主題。Koh來是Niû Siù-tek（梁秀德）〈Lín hō͘ in 食〉。親子篇：Kè-hô-chut〈囡仔ê教育 〉，提醒爸母愛kap學校合作負起管教囡仔ê責任，共同謀求解決囡仔問題ê方法；論起教育囡仔ê時間以及教育觀念，教育是引chhōa囡仔追求真理、啟發智識、指示in知人生正確ê目的kap意義，防止並糾正in ê歹習性kap行為，領導in向上kap進取，hō͘囡仔ê身心得tio̍h充分合理ê成長。Iûⁿ Sū-ióng（楊士養）寫ê〈名人傳記〉，本期紹介「Bān Chin-chu（萬真珠）姑娘」，1888年來台，kap朱約安、文安姑娘創設長老教會女學校，真關心女子教育事工，也對女宣道會ê創設有大關心kap幫贊，伊生做體型khah胖（phàng），行路khah慢，m̄-koh真照起工探訪，hō͘人稱做gâu探訪ê，真受人敬愛。漢字文章：鄭慧惠〈心理學諸問題〉。林妙珠〈育嬰知識〉。戴吳丁妹〈插花漫談〉。黃李秀賢〈料理〉。陳詹和妹〈女宣道處理事會議事錄〉。後面是兒童樂園： 囡仔古Âng Ngá-hūi〈有疼心ê烏鴉 〉，1隻細隻烏鴉，對老母有孝，koh幫贊1隻iau飢迷路ê羊仔囝chhōa kàu tńg厝ê路ê故事。最後是Chiong Sūi-lêng（鍾瑞能）〈澎湖ê消息〉kap編輯室ê〈新聞〉。（文/Bo̍k ilī）