Chit份資料有章8篇、歌詩1 首、消息3條、公告1條。Tī〈序言〉了後是靈修部由屏東和平教會Khó͘ Tek-khiam（許德謙） 用〈耶和華是我牧者，我無欠缺〉為題，感謝耶和華常賜逐項夠額，chhōa阮kiâⁿ過死蔭山谷，hō͘咱得勝一切，koh thang永tiàm天家，勉勵信徒tio̍h用信心、ǹg望、仁愛來kiâⁿ天路，tio̍h記得上主恩典，感謝主、o-ló主。家庭部針對感謝節設計〈家庭感謝節禮拜順序〉，tī家庭beh進行感謝節ê禮拜進行ê指導，koh提供1个細囝奉獻所有金錢去幫助戰爭枵飢兒童ê故事做講道內容，後面接sòa 1首用〈感謝節ê歌：掖種〉ê宗教歌詩。宣揚部，Ông Siok-hoa〈Cháiⁿ-iūⁿ做好ê奴僕〉，是tī淡水靈修會ê演講。服務部，由Lâu Lō͘-tek（劉路得） 介紹部分台灣教會ê社會機構，台北馬偕病院、台中中會彰化病院、嘉義沿海傳道醫療團、台南診療所、北門嶼：南中沿海烏跤病醫療所、東中：高山同胞玉山神學院。研究部，Gô͘ Chheng-ek（吳清鎰）〈查經：賢妻〉是tī全台夏季女宣靈修會ê講演。後壁1篇無作者名ê〈Ta-ke kap sim-pū（姑媳問題）〉。台中光音育幼院Lâu Pó-khiang分享ê見證〈感謝主、o-ló主〉，人生經歷百般艱苦，感謝主憐憫賜福，兒女有孝、勤儉、勤讀，有上主ê領導祝福，hō͘我有今日ê快樂，感謝主、o-ló主。 （文/Bo̍k ilī）