Chit份資料ê內容有：卷頭詞：Tiuⁿ Hông-chhiong（張逢昌）〈受難週〉，「Koh活節」進前ê受難週是教會重要ê節期，beh hō͘咱特別siàu念基督救主ê受難。Koh來是講座：有Gô͘ Chheng-ek（吳清鎰）〈舊約聖經各卷的總論—第十五章：約伯記〉，本文用：1.本書ê名稱、2.本書ê內容區分、3.約伯記ê問題kap教示，3 ê小主題來導讀約伯記。Lîm Gio̍k-tiân（林玉田）〈新約聖經各卷的總論—第十四章：歌羅西書〉，本文用：I.歌羅西教會kap保羅、II.寫歌羅西書ê事情、III.歌羅西書ê特色、IV.內容介紹，4 ê小主題來做講解。接落去ê禮拜指導：分做〈幼稚科〉kap〈兒童禮拜〉。〈幼稚科〉由幼稚教育小組編寫，內容有：每月ê總題、目標、金句，chit期ê總題是：「耶穌講故事hō͘人聽」；另外，每禮拜ê教材教案有：主題、目的、聖經、聖詩、（教材、教具）準備、引起動機、故事、課後活動等設計。〈兒童禮拜〉是Ông Lâm-kia̍t（王南傑）負責，教案有：金句、聖詩、聖經、講道。分科ê教材：〈初級〉ê部份是Ko Chú-hiong（高主香）編寫，〈高級〉ê部份由Chiong Bō͘-sêng（鍾茂成）負責，每禮拜課程有設：題目、目的、聖經、教師ê準備、學課（就是課程ê進行）。繼續是成人家庭教育科，有2篇：Iûⁿ Sū-ióng（楊士養）〈小兒洗禮〉，介紹教會小兒領洗禮ê制度kap辦理方式。Tīⁿ Liân-khun（鄭連坤）〈關係家庭ê經濟〉，用1.受託ê精神(Stewardship)、2.生產kap消費、3.消費經濟kap 4.Tio̍h chiâⁿ做好ê管家，4 ê主題進行論說。（文/Bo̍k ilī）