Chit份資料ê內容有：卷頭詞： Tiuⁿ Hông-chhiong（張逢昌）〈致意chiah ōe chiâⁿ〉，教育ê目的是tio̍h chhōa主日學學生體驗上帝ê疼，接受耶穌做救主，入tī 教會來實行信徒ê本份；Che是咱ê責任，也是教會ê使命。Koh來是講座：有Gô͘ Chheng-ek（吳清鎰）〈舊約聖經各卷的總論—第十四章：以斯帖記〉，本文用：1.本書ê名稱、2.本書ê內容區分、3.本書ê性質kap故事ê內容、4.本書ê特色kap教示等幾 ê小主題來做導讀。Lîm Gio̍k-tiân（林玉田）〈新約聖經各卷的總論—第十三章：腓立比書〉，本文用：I.腓立比城ê歷史、II.腓立比教會ê成立、III.寫腓立比書ê事情、IV.特色、V.內容概要，5 ê小主題來做介紹。接落去ê禮拜指導：分做〈幼稚科〉kap〈兒童禮拜〉；〈幼稚科〉由幼稚教育小組編寫，內容有：每月ê總題、目標、金句，chit期ê總題是：「家庭ê快樂」；每禮拜ê教材教案有：主題、目的、材料（聖經、聖詩、（尪仔）圖）、引起動機、故事、課後活動等設計。〈兒童禮拜〉是Ông Lâm-kia̍t（王南傑）、So͘ Hūi-chin（蘇蕙蓁）負責，ta̍k禮拜ê教案有：金句、聖詩、聖經、講道。分科ê教材：〈初級〉ê部份是Ko Chú-hiong（高主香）編寫，〈高級〉ê部份由Chiong Bō͘-sêng（鍾茂成）負責，ta̍k禮拜課程大約有設：題目、目的、聖經、教師ê準備、學課（就是課程ê進行）。繼續是成人家庭教育科，有2篇：Iûⁿ Sū-ióng（楊士養）〈成人洗禮〉，「洗禮」是基督教重要ê禮典之一，有成人洗禮kap小兒洗禮，本文簡介教會成人洗禮ê因由、制度kap辦理方式。Lâu Lō͘-tek（劉路得）〈子女ê教育〉，英國1 ê教育家講：「Ta̍k時代tio̍h負擔hit-ê時代ê教育；若無，對教育kap文化ê方面，一代過一代ē漸漸破產。」每一代ê責任，就是保存好ê傳統kap系統；所以，做pē母抑是先生ê人，tio̍h ài 負起教育ê責任，因為子女教育ê結局ē影響tio̍h本身kap社會、國家ê未來；本文用：「I.好ê模樣、II.保存pē囝、先生、學生ê好交陪、III. Pē母、先生tio̍h ài ē記得in也bat做囡仔、IV.家庭是好ê收容所、V.真kap久長ê福氣ê由來」，chit幾點來hō͘讀者做教育法參考。最後是Tiuⁿ Hông-chhiong（張逢昌）〈編者ê話〉。（文/Bo̍k ilī）