Chit份資料ê內容有：卷頭詞：Tiuⁿ Hông-chhiong（張逢昌）〈聖誕節〉，tio̍h省察聖誕節ê活動kám有達kàu教育目的，m̄-thang「勞而無功」。Koh來是講座： Gô͘ Chheng-ek（吳清鎰）〈舊約聖經各卷的總論—第十二章：以斯拉記〉，本文用：1.本書ê名稱、2.本書ê性質、3.以斯拉ê人物、4.本書ê內容區分等主題來做導讀。另外有Gô͘ Chheng-ek（吳清鎰）〈答覆讀者ê質問〉，答覆讀者提問有關約書亞ê年歲ê疑問。以及Lîm Gio̍k-tiân（林玉田）〈新約聖經各卷的總論—第十一章：加拉太書〉，用：I.保羅kap加拉太教會、II.寫加拉太書ê事情、III.內容介紹，chia-ê主題來做介紹。接落去是〈幼稚科〉kap〈兒童禮拜〉ê禮拜指導：〈幼稚科〉由幼稚教育小組編寫，ta̍k禮拜ê內容配合1 ê主題，koh分做：聖經、目的、金句、複習、引起動機、頭序（包括主要課程）、活動等設計。本期最後1課是慶祝聖誕。〈兒童禮拜〉ê部分是：「金句ê故事」，由Lōa等幾位負責編寫，每禮拜ê教案有：金句、聖詩、講道抑是故事。分科ê教材，有〈初級〉kap〈高級〉，ta̍k禮拜〈初級〉ê課程教案有：題目、聖經、目的、Kàu-ōa；〈高級〉ê用1段聖經（經文）來進行研究kap討論。繼續是成人家庭教育科，有2篇：Ông Sêng-chiong（王成章）〈永活〉，永活是tī基督ê內面，咱chiâⁿ做上帝ê囝兒，無論tī現在抑是將來、tī地上抑是天裡，基督徒beh享受chit-ê永活。Tân Bêng-tek（陳銘德）〈選擇對方〉，teh講婚姻是過去tī無sāng款ê環境中長大ê一對男女開始過共同ê生活，所以起頭ta̍k項ē bē真好勢，tio̍h互相適應、努力建設，chiah有幸福成功ê婚姻。婚姻ê對方若過頭無成熟，以後適應ke真困難；Án-ni家族、囝兒、朋友、教會、社會也ē受影響，所以選擇對方實在是終身ê大事。選擇對象tio̍h考慮幾項上要緊ê事：1.對方ê信仰kap人格、2.對方ê家庭、3.對方ê年齡、教育、興趣等kap 4.戀愛kap選擇ê關係。（文/Bo̍k ilī）