Chit份資料ê內容有：卷頭詞：Tiuⁿ Hông-chhiong（張逢昌）〈光榮kap責任〉，tī新學期開始ê機會咱做傳教者、做教員kap全信徒，tio̍h koh 1 pái自覺受交代ê責任ê重大，再認識hit-ê工程kap責任。Koh來是講座2篇：1篇是Gô͘ Chheng-ek（吳清鎰）〈舊約聖經各卷的總論—第九章：撒母耳上下卷〉，本文用：「1.本書ê名稱、2.本書ê目的、3.本書ê內容kap 區分、4. 本書ê教示」等主題來做導讀。另外1篇是Lîm Gio̍k-tiân（林玉田）〈新約聖經各卷的總論—第八章：羅馬書〉，有：「I.羅馬教會、II.寫羅馬書ê事情、III.內容概要」chit幾主題來做介紹。接落去ê禮拜指導：分做〈幼稚科〉kap〈兒童禮拜〉；〈幼稚科〉由幼稚教育小組編寫，ta̍k禮拜ê教材教案有：主題、目的、聖經、聖詩、準備、引起動機、故事、故事後ê活動等設計。〈兒童禮拜〉ê部份是：「金句ê故事」，是Lōa等負責編寫。分科ê教材，有〈初級〉kap〈高級〉，ta̍k禮拜〈初級〉ê課程教案有：題目、聖經、教ōa；〈高級〉ê用1段聖經（經文）來進行研究kap討論。繼續是成人家庭教育科2篇：Keh Hô-lia̍t（郭和烈）〈聖靈〉，教理釋義，tī新約聖靈做拯救ê氣力來賞賜罪人是tī主十字架kap koh活了後，使徒稱做「應允ê聖靈」；應允ê聖是對基督所賞賜ê，所以是基督ê靈；聖經所干證ê上帝是唯一ê上帝，che是三位一體ê上帝ê信仰：Pē chhe囝；囝啟示Pē；囝賞賜咱聖靈；聖靈對咱真實啟示囝基督；也就是存tī聖經內ê三位一體ê思想kap信仰。〈Ta-ke kap新婦〉，Ta-ke kap新婦ê問題生成ê原因大概有：「1.個性ê遺傳、2.環境、3.教育程度、4.年紀相差、5.選擇、5.期待」等ê遠因；Koh來是：「1.婚禮以及進行上pí-chiap（比接）、2.外界ê影響、3.內面ê影響」等ê近因；Sòa落講「今後完善ê參考」，用：1.Tio̍h ài有理解、2.同情、3.體貼，最後上要緊ê，tio̍h用信仰saⁿ造就。（文/Bo̍k ilī）