Chit份資料ê內容有：卷頭詞：Tiuⁿ Hông-chhiong（張逢昌）〈設成人科〉，主日學m̄是kan-ta囡仔ê，主日學是對搖籃kàu棺材，就是對出世kàu死lóng有關係、lóng有份；像日本將主日學換做教會學校；Tī咱ê教育處對今年正月有ke成人家庭科，對本月起koh再ke-thiⁿ成人科，ǹg望ta̍k家ē kap家庭科合併來活用；Koh khah要緊tio̍h創設成人科，hō͘教會若m̄是學生，就是先生，hō͘咱ê教會koh-khah進步。Koh來是講座2篇：1篇是Gô͘ Chheng-ek（吳清鎰）〈舊約聖經各卷的總論—第七章：士師記〉，本文用：「1.本書ê名稱、2.士師時代ê特色、3.本書ê內容區分、4. 本書ê重要ê教示」等主題來做導讀。另外1篇是Lîm Gio̍k-tiân（林玉田）〈新約聖經各卷的總論—第五章：使徒行傳〉，有：「I.使徒行傳對新約教會ê貢獻、II.著者、時間、地點、III.讀者、IV.目的、V.特色、VI.內容概要」chit幾主題來做介紹。接落去ê禮拜指導：分做〈幼稚科〉kap〈兒童禮拜〉；〈幼稚科〉由幼稚教育小組編寫，chit期總題：「新約ê囡仔」，ta̍k禮拜ê教材教案有：主題、詩歌、聖經、準備、目的、引起動機、故事、故事後ê活動等設計。〈兒童禮拜〉ê部份是：「金句ê故事」，由Lōa、S. K.、Siok-kheng等負責編寫。分科ê教材：分〈初級〉kap〈高級〉，ta̍k禮拜〈初級〉ê課程教案有：題目、聖經、目的、內容，初級教材是Phoaⁿ Kian-hiong等負責編寫；〈高級〉ê用1段聖經（經文）來進行研究kap討論。繼續是成人家庭教育科2篇：Keh Hô-lia̍t（郭和烈）〈聖Pē〉，教理釋義，作者用：「I.上帝是聖ê」kap「II.上帝是Pē」來說明聖Pē ê意思，干證基督教對聖經領受「上帝是聖ê Pē」ê教理信仰。Gô͘ Chheng-ek（吳清鎰）〈夫婦間的調和〉，待續，chit期先用：「1.夫婦間ê調和是指夫婦間tī任何方面、任何問題tō無發生衝突，ē完全相處；2.調和tio̍h根據夫婦間ê愛情；3.總是夫婦ê愛情是sím-mi̍h?」chit 3點先來談論「夫婦間ê調和是sím-mi̍h」。（文/Bo̍k ilī)