Chit份資料ê內容有：Poàn Lông-seng〈母性ê偉大〉，母性是對上帝所選定，hit-ê母性有偉大，責任也重大，做老母ê lóng ài伊ê囝兒純良、偉大，chiah ē-thang貢獻社會，奉事人群，用chit號ê慈母心培養kap教育，koh khah ài hō͘上帝歡喜，做母性ê是囝兒ê母性，也ài是家庭、社會、人類ê母性。Un-chō͘譯，介紹1位名人ê老母：〈Iok-hān A-sut-ní-su ê老母〉，介紹Iok-hān A-sut-ní-su（John Ashiworth）ê成長過程 kap 伊ê老母ê記事。Siú-gû: Lōa Jîn-seng（守愚：賴仁聲），兒童宗教教育小說：〈所ǹg望ê囝〉（待續），1 ê少年ê寡婦，靠ka-kī雙手chhiâⁿ養2 ê細囝，日子克苦iáu-koh真致意tī家庭ê宗教教育ê故事，chit期是〈2：3款家庭〉。Chú-kò͘〈小姐你teh選擇sím-mi̍h對象〉，用比喻故事kap聖經教示，來忠告女性選擇對象tio̍h注意kap注重ê事項。Chiā Hí-bêng（謝禧明）〈家庭是教育ê環境〉，環境對人ê影響真重大，1 ê人ê思想、人格、前途往往受環境支配；家庭是 1 ê人所生長ê基本環境， m̄-thang忽略家庭ê環境，tio̍h hō͘你ê家庭chiâⁿ做1 ê有豐盛活命ê基督化家庭，因為教育就是生活，hō͘ 生活合tī教育ê標準chiah是理想ê生活。Lōa Jîn-seng（賴仁聲）〈疼ê hun-ú〉，提醒基督徒的確tio̍h保守疼（愛）情ê純潔，lóng tio̍h照禮數寶貝hit-ê異性疼ê神祕，對老kàu少年，對chit層事tio̍h尊重，hit-ê人ê人格chiah ē得khiā在。T. E. C.譯，〈家庭娛樂〉，接頂期，繼續提供家庭娛樂ê幾種遊戲項目kap sńg法。〈心理學家對婚姻ê看法〉，接頂期，無論人對婚姻有ta̍k樣無siāng款ê看法，總是一夫一婦ê小家庭制度，是比較khah理想kap完滿ê，也是大多數ê人贊成ê。Lîm Gī-bō͘〈老大人ê健身寶鑑〉，食老beh老康健，平常tio̍h注意保健ê原則，提供Ài-tek-hôa博士ê 10大健身寶鑑做參考。〈主耶穌ê呼召〉，John. M. Wigner作詩，Chiu Thian-lâi（周天來）譯，福音詩1首。（文/Bo̍k ilī）