Chit份資料頭前第一部分是作者講起伊所知、所看見ê宋尚節博士，本文所講ê宋尚節博士除一般人所知全心力致意tī宣教事工以外，koh有寫tio̍h宋尚節博士ê一寡小故事，比如：「無譜beh按怎彈」，講tio̍h作者tòe宋博士佈道ê時，宋博士唱歌真隨性，有時m̄-nā無照曲調、koh無照pán-liâu（節拍）；koh有宋博士ê飲食習慣：「一工一隻雞」等代誌。第二部分是以〈宋博士蓋棺定論〉為題，分做7段ê論述，講tio̍h伊雖然m̄是一位神學畢業生，m̄-koh伊是一位真正讀過神學ê傳道者。伊雖然ka-kī認脾氣m̄好，但伊是一位絕對順服上帝ê旨意ê人。雖然bat接受真chōe物質上ê幫贊，若是伊絕對無貪財愛世間。雖然有真chōe夠額thang展ê長處，但是伊寧可甘願講主奇妙恩典。伊雖然感覺ka-kī ê無完全，但是伊有盡力kap上帝同行。雖然tú-tio̍h真chōe人ê批評kap反對，伊絕對無餒志冷心。伊雖然tī世上無kàu 44年，但是伊ê工作ê效果到taⁿ iáu tī-teh，影響真長遠。（文/Bo̍k ilī）