Chit份資料ê內容是故陳金然牧師ê手稿遺稿，主要對舊約ê內容做歷史簡介，目的beh通過舊約kap當時歷史與文化ê紹介，來幫贊了解舊約kap現今ê相關性。本資料內文有8篇：I.〈古代近東的世界—O.T的世界〉，介紹舊約地理te̍k背景，講起古代近東ê地理，hit所在ê族群、人種kap歷史簡介；II.〈Israel（以色列）民族ê起源〉，根據創世記內容講起以色列民族ê起源；III.〈Mose （摩西）時代〉，論以色列人對創設新ê宗教，建立以色列民族ê基礎，以色列ê歷史、文學、思想ê起源是對Mose起，有關摩西ê事蹟tī舊約聖經ê〈出埃及記〉、〈利未記〉、〈民數記〉、〈申命記〉等lóng有記寫，本章有講tio̍h埃及地hit當時ê統治者；因為摩西救同胞脫離tī埃及ê苦楚，也thang算是以色列建國ê祖，以色列百姓koh對「是舊iáu-kú永新」ê信仰來得tio̍h救贖，因為chit-ê上帝ê恩典，以色列kap上帝成立契約，10誡tio̍h是tī chit-ê契約ê基礎來成立ê；IV.〈入Canean（迦南）kàu王國ê成立〉，談論關係〈約書亞記〉所記載摩西死後以色列進入迦南kap征服迦南各族ê經過，kàu以色列王國ê成立chit段時期ê歷史kap族群關係；V.〈王國ê成立kàu分li̍h〉，講論以色列王國對掃羅王、大衛王、所羅門王一統期間，了後分裂做南北兩國，hit-chūn以色列kap周圍ê國族ê關係，koh有宗教爭鬥；VI.〈先知ê宗教〉，先知hông講是傳上帝ê話ê人，所以in kap現實ê歷史有真深ê關係，舊約做先知ê人差不多是tī以色列歷史ê危機抑是國家存亡關頭ê時做先知，in因為有深深經驗上帝聖ê旨意真強貫串tī伊本身、tī生活，所以一神教在tī做先知ê人來講m̄-nā是思想，koh khah是確信；VII.〈受lia̍h前ê先知〉kap VIII.〈受lia̍h後ê前後生活〉，講論舊約聖經中ê先知書中ê先知角色，kap受in影響ê政治、宗教發展等。（文/Bo̍k ilī）