Chit份資料ê內容是聖經公會所進行ê台語聖經新譯本，其中新約聖經當中ê約翰書信ê試讀本，本台語譯本內文用漢字kap羅馬字對照合印ê方式呈現。參與台語新譯聖經ê譯者有：故鄭連坤牧師、翁修恭牧師、斯當時台灣神學院ê廖上信院長、台南神學院ê張德香院長、王成章博士，翻譯顧問：駱維仁博士指導，siāng時koh得tio̍h楊神榮先生kap陳賢豪牧師tī電腦程式設計ê協助，頭pái採用電腦輸入台語羅馬字kap漢字對照排版，突破傳統出版作業phah字ê技術。「現代台語」ê聖經譯本ê翻譯理論是根據Nida所提出ê「功能對等」（functional equivalence）ê原則，認為翻譯者ê任務是beh為現代ê讀者再現原文讀者所得tio̍h ê信息；Só͘-pái，現代台語ê聖經譯本強調「功能對等」ê原則，用現代ê語言上自然ê表達法來翻譯經文，ē比早期注重「形式對應」（formal correspondence）ê理論所翻譯ê經文khah正確、完整，mā hō͘現代人khah容易明瞭；Koh有，新譯本所採用ê語音是khah偏台北腔，kap早期ê台語聖經「巴克禮譯本」，採用19世紀ê廈門話，以及採取早期「形式對應」ê翻譯原則，是chit本「現代台語」聖經譯本kap巴克禮譯本cheng-chha ê所在。（文/Bo̍k ilī）