Chit份資料ê內容原著是Iûⁿ Kek-hui（楊格非）牧師（Dr. Griffith John），由Liâm Tek-lia̍t（廉德烈）牧師（Rev. A.B. Nielson, M.A.）譯做台語白話字，用聖經奧妙道理，來闡明耶穌救世ê苦心，ài人人saⁿ-kap bat chit條天路。也ta̍k站指明，hō͘人m̄免迷失，kiâⁿ m̄-tio̍h，所以名叫「天路指明」。主耶穌ê教示講：「我就是路，就是真理。」救主就是天路，無kiâⁿ天路ê的確ē poa̍h倒、迷路；因為人m̄知上帝ê真理，本冊chiah分做「上帝總論」、「上帝ê稱呼」、「上帝獨獨 1 ê」、「上帝無形像」、「上帝ê體」、「耶穌降生」、「降生ê憑據」、「降生ê緣故」；用chiah ê 1項1項指明，hō͘ 人看了lóng明白，ná親像kiâⁿ tī大路一樣。主耶穌為tio̍h憐憫世間人，離開上帝榮光，降生落世間。Koh用「耶穌koh活」、「耶穌上天」、「信來稱做義」，chit幾章指明人1條ê正路；sòa落koh用「正心ê實理」、「Koh活ê道理」、「上帝審判世間人」、「信kap無信ê關係」，來指明天下間ê人ê活路kap soah尾ê路。最後用「教會ê聖禮」、「反悔改變最要緊」來kiâⁿ，án-ni天路ê路站就完全。Ǹg望人人看chit條做要緊ê路，m̄-thang離開半步，m̄-thang半途而廢；照指明ê路徑來kiâⁿ；用án-ni安穩來kiâⁿ天路，穩當直到天堂，做天Pē所揀ê百姓，享受天頂永遠ê福氣。（文/Bo̍k ilī）