Chit份資料ê內容teh講「新教法beh cháiⁿ-iūⁿ入手」，內文講：新教法是將囡仔看做全家ê中心，家內一切lóng按照對囡仔ê好處來安排。新教法入手ê頭1項：Tio̍h對第一快做ē kàu ê代誌做起，人人做ē-kàu ê就是教囡仔thit-thô，hō͘ in無吵鬧，細漢ê囡仔若是無閒thit-thô，伊就快樂無pháiⁿ脾氣，所以咱應該常備辦thit-thô物教in thit-thô，詳細方法thang參考「Cháiⁿ-iūⁿ hō͘細漢囡仔bōe吵」hit本冊。第2項就是chhōa囡仔saⁿ-kap做家內ê事，細漢囡仔是好動ê，若是hō͘ in有sím-mi̍h代誌thang做，伊ta̍k-pái ē真歡喜，不過做老母ài ē-hiáu囡仔ê心理，tio̍h hō͘ in快樂來做，koh hō͘伊所做ê，是in ka-kī ê事，m̄是替老母做ê，che thang參考「Cháiⁿ-iūⁿ教細漢囡仔幫贊家內代誌」chit本冊；做老母tio̍h ē記得，教囡仔幫贊家事，真正ê目的，是beh hō͘細漢囡仔快樂，koh叫伊練習順服，所以老母起頭應該費淡薄工夫來教in做，因為做ē好sè就ē khah歡喜做，後來自然ē幫贊老母真chē。第3項是對今仔日起，ta̍k-pái tú-tio̍h咱對囡仔發受氣ê時，kiám-chhái想beh phah伊、駡in ê時試將咱ê受氣壓制、心平氣靜kap in講情理，hō͘ in明白為cháiⁿ-iūⁿ tio̍h án-ni做，cháiⁿ-iūⁿ m̄-thang án-ni做，詳細ê方法，thang參考「Cháiⁿ-iūⁿ 教囡仔順從」hit本冊。無論beh實行toh 1項代誌lóng tio̍h有起頭有路尾，堅持到底，chiah-ē看見功效。（文/Bo̍k ilī）