Chit份資料ê內容有2 ê故事，提供野外禮拜、佈道、聖誕節等thang用來演劇抑是準做小說來讀ê路用；第一ê故事「LŌNG-CHÚ HÔE-THÂU（浪子回頭）」，講1 ê散赤ê家庭ê老母辛苦chhiâⁿ養一對兄妹仔，兄哥大漢了變放蕩， kiâⁿ菜店、kap人你兄我弟lim食、poa̍h-kiáu，無顧老母破病，無錢tio̍h tńg去厝強the̍h，甚至koh去搶劫醫生，後來基督徒ê醫生憐憫老母soah赦免兄哥ê罪，就án-ne浪子悔改，全家信主。第二ê故事是「CHHÌ-TIONG HOE（棘中花）」，chit家厝裡ê大兄、大嫂是愛虛華無疼心ê人，二兄hông召去做日本軍夫，soah失聯，chhun二嫂照顧年老ê ta-ke kap幼年ê小姑，二嫂是虔誠基督徒，也將信仰介紹hō͘ ta-ke kap小姑，總是大嫂pháiⁿ心生話造謠趕走二嫂，koh苦毒老ta-ke kap小姑，大兄tī 台北詐欺hoâiⁿ人ê 財被掠關監，全家烏雲慘霧，chit時二兄tńg來，講tī海外tú-tio̍h意外hō͘熱心基督徒救助變做生理人，賺大錢，就替兄還清債務，兄kap嫂2人ǹg伊懺悔，後來，kā二嫂接tńg來，全家團圓koh歸信主基督。（文/Bo̍k ilī）