活活埋   Nî牧師去佇印度傳教濟濟年久。轉去英國的時，一位朋友對伊講，Nî牧師你佇印度的時常常拄著風險的事，請你講淡薄分阮聽。Nî牧師講，好，我講淡薄。我佇印度的時，捌踮佇喜馬拉山的山跤。佇彼所在有不止濟西藏人帶物來táu換，因為西藏是印度的隔壁國。我也學淡薄西藏的土音，後來紲會曉傳道理予in遮的人聽。遮个人平素是佛教，不止對重西藏的活佛。 有一日我tú-teh傳道理的時，忽然聽見一个西藏人teh叫我。伊講伊的老爸破病真傷重teh欲死，愛我緊去安慰伊，紲傳主的福音予in聽。我就佮伊做陣去。佇路中有4个西藏人也佮我做陣行。到阮入佇西藏國的地界，這幾人隨時出手共我掠，紲用索仔縛我。後來拖我到佇一間廟和尚頭的面前。遮个人lām-sám控告我，講我用基督的道理teh引誘人。和尚關我佇監內一禮拜久。監內暗閣真lah-sap。日時枵餓無通食，暝時睏土跤，無被通蓋，我經過七日的大艱苦。 到第八暗共我定死罪，講欲活活埋。就派三个和尚佮四个人牽我出去。彼時雨大、風透，暝閣暗，我寒到gī-gī-chhoah。三个和尚予雨ak，想siān就倒去，總是彼四个直直牽我到佇山坑的所在。遐有一khut土khut嶄然深。到位的時hiat我佇遐。予in掠去的時我所有的物攏予in 搶，佳哉身軀藏一枝手裡的電灯予in搶無去。佇土khut 底的時，我電灯緊ni̍h四界照。看見一塊pang佇遐，我趕緊用手提來jia我的頭殼。心內感謝上帝，因為伊備辦這个脫離的路予我。 閣tiap-á久石頭佮土直直luī落來。我的手kòng到規空，總是欲ti̍h性命也毋驚疼。連續予土石摃倒兩三擺，我phe死閣peh起來，雙手kia̍h pang出力thaⁿ2佇我的頭殼頂。但是土石無閣ka-la̍uh，通知遐个人已經倒去，我好膽出大力，對墓下 peh起來。也將手裡的電灯chhiō路，我逃閃走到有通bih 的所在。彼暝我睏佇石穴無被通蓋，我將焦的樹葉佮草chún 被來蓋我的身軀。 天光我peh袂起來，因為拄著熱症真傷重。熱攏袂退，又身軀無力，我姑不將bih佇穴內幾若日久。我知我是著腸仔病。佇穴內非常寒，閣tâm，真艱苦，才ûn-ûn-á 爬出去外面曝日。佇遐teh 倒，想死的日已經近lah。忽然聽見跤步聲。心想敢是對敵來lah，今無法度走袂離，的確著死。目睭展開一下看，才知上帝聽見我的祈禱，差伊的奴僕，我至好的朋友欲來救我。朋友就是英國陸軍的 大佐。伊緊緊將衣裳予我穿，水予我啉，也細膩扶我到安穩的所在，佇遐暝日照顧我三禮拜久。 我問伊啥事離開印度來到西藏。伊應講，你離開印度欲去西藏的時，我的心攏袂平安。看你成禮拜久無倒來，我的心ná僥疑，驚了你予人害死。到頂日佇厝裡teh坐，忽然ná親像有聽見聲teh講，某人你著去揣Nî牧師，著趕緊去救伊。我隨時起身，祈禱上帝著chhoā我到佇你面前。經過山嶺危險的所在，這tia̍p 果然通佮你相見。上帝的恩實在大。咱著感謝伊。 無久我的身體較勇健，我猶原照舊四界去佈道。 路尾閣去西藏傳主的福音。遐个人看見我真大奇怪，講我是對死閣活。大家不止尊敬我，也歡喜聽我的所講。我也poah 工閣去山裡看我的墓，攏用土蓋到tiⁿ7-tiⁿ7。 今我出門四界去，無人伸手欲害我，反轉歡喜聽我講基督怎樣對死人中閣再活佮伊至寶貝的道理。有時上帝予咱拄著艱苦，到尾是欲予咱知伊的大路用。

基本資訊